Jerebe nátıjesinde Qazaqstan komandasy sary túske boıalǵan tórt tankige ıe boldy. Konkýrs uıymdastyrýshylary - reseılik taraptan usynylǵan tehnıkany tehnıkalyq qamtamasyz etý toby ofıserleriniń basshylyǵymen epıpajdar qabyldady.
Qabyldaý barysynda tankilerdiń tehnıkalyq jaǵdaıy, jaýyngerlik mashınanyń bólikteri jáne mehanızmderiniń jaramdylyǵy men qabilettiligi tekserildi. Sonymen qatar tankterdiń tehnıkalyq qamtamasyz etilýi jáne paıdalaný aldyndaǵy daıyndyqqa nazar aýdaryldy.
Qazaqstandyq áskerı qyzmetshiler jaýyngerlik mashınalardyń jaǵdaıy qanaǵattanarlyq ekendigin jáne «Tank bıatlony» saıysy aıasyndaǵy barlyq tapsyrmalardy oryndaýǵa múmkindik beretinin atap ótti.
Jarys bastalmas buryn qazaqstandyq tankishilerge qarý-jaraqtyń daıyndyǵy men dáldigin durystap, tank bıatlony trassasynyń baǵytyn muqııat zerdeleý qajet.
Eske sala keteıik, Armııa halyqaralyq oıyndary-2020 aıasynda ótkiziletin «Tank bıatlony» halyqaralyq jarysy 23 tamyz - 5 qyrkúıek aralyǵynda «Alabıno» polıgonynda ótedi. Qazaqstandyq komanda alǵashqy jeke jarysyn 25 tamyz kúni bastap, Qyrǵyzstan, Reseı jáne О́zbekstan tankishilerimen birge bir topta óner kórsetedi. Jalpy saıysqa 16 eldiń tank ekıpajdary qatysady.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.
