Aýyl sharýashylyǵy, ınvestısııa tartý jáne qurylys boıynsha da óńirdiń damý qarqyny joǵary. Sońǵy aıda bıýdjet shyǵyndary belgilengen mejeden 2 mlrd teńgege artty. Munyń bári áleýmettik-ekonomıkalyq damýdyń oń dınamıkasyn saqtap otyr. Bul dınamıka jyl sońyna deıin saqtalady degen úmit bar, oǵan qol jetkizýge rezerv jetkilikti.
Oblys ákimi Qumar Aqsaqalov ár saladaǵy ekonomıkalyq ósimderge toqtaldy. Atap aıtqanda, aýyl sharýashylyǵynyń ósimi byltyrǵy sáıkes kezeńmen salystyrǵanda 102,8%-ǵa artqany aıtyldy. О́ndirilgen ónim kólemi – 103,9 mlrd teńge. Bul – byltyrǵydan 10 mlrd teńgege artyq degen sóz. О́simdik sharýashylyǵy ónimderi byltyrǵydan kem emes. Mal sharýashylyǵy ónimderi 102,9%-ǵa artqan.
Degenmen, keıbir aýdandarda óndiris kórsetkishteri byltyrǵymen salystyrǵanda tómen. Máselen, oblys ortalyǵynyń irgesindegi Qyzyljar aýdanyndaǵy aýylsharýashylyq ónimi byltyrǵymen salystyrǵanda 92,7% bolyp otyr. Iаǵnı ónim kólemi 15,1 mlrd teńgege tómendedi degen sóz. О́ndiristiń tómendeýi negizinen jumyrtqanyń azaıý sebebinen bolyp otyr. Degenmen, bıyl maýsym aıymen salystyrǵanda shildede 13 paıyzǵa artty.
Oblystaǵy óńdeý kásiporyndary jaqsy nátıje kórsetýde. Máselen, «Maslodel» JShS ónimin byltyrǵy sáıkes merzimmen salystyrǵanda 46%-ǵa arttyryp, 45 myń tonnadan artyq ónim shyǵardy. Sonyń ishinde sút, aıran, qaımaq, maı jáne taǵy basqalary bar. Kásiporynda 340 adam jumys isteıdi, eńbekaqylary bıyl 20 paıyzǵa joǵarylady. Deńgeıi osy kásiporynmen qaraılas «Molprodýkt» JShS-da 220 adam jumys isteıdi. Kompanııa jyl basynan beri 41,5 myń tonna ónim shyǵardy.
Et óńdeý kásiporyndarynyń qarqyny kóńil qýantady. Aıtalyq «Kazmıasoprodýkt» JShS-sy josparly mejeni 108 paıyzǵa oryndady. «SK – Mıasoprodýkt» JShS da qalysar emes, kásiporyn jyl basynan beri 135 mln teńgeniń 180 tonnadan artyq shujyǵyn óndirdi.
Otyrysta aıtylǵandaı, jeti aıda 80 mlrd teńgeniń azyq-túligi shyǵaryldy. Bul byltyrǵydan 16 mlrd teńgege artyq. Ákimdik jyl qorytyndysy boıynsha ósim 4 paıyz bolady dep mejelegen, biraq kórsetkish asyp túsetin túri bar.
О́nerkásiptiń byltyrǵy jyldyń sáıkes merzimimen salystyrǵandaǵy ósimi 108,1 paıyz boldy. Al respýblıka boıynsha ortasha kórsetkish 101,3 paıyz ekenin aıta keteıik. Iаǵnı ósim 27 mlrd teńgege artty.
– Oń dınamıka bizdiń zaýyttardyń alǵan tapsyrystarynyń ósiminde de baıqaldy. Ol 16%-ǵa artyp, 38 mlrd teńgege jetti. Sonyń ishinde «Munaımash» kompanııasynyń ósimi 106,1%-dy, «Petromashzavodtyń» ósimi 125,7%-dy qurady. «Petropavldyń metalkonstrýksııa zaýyty» 1,7 mlrd teńgeniń 2,5 myń tonna ónimin shyǵardy. «Edınstvo» JShS óndiris kólemin 42 paıyzǵa deıin ulǵaıtty, – dedi oblys ákimi.
Negizgi kapıtalǵa salynǵan ınvestısııa kólemi de bıyl 18,8%-ǵa artty. Sonyń nátıjesinde 120 mlrd teńge óndiriske quıylyp, byltyrǵymen salystyrǵanda 19 mlrd teńgege artyq boldy.
Oblys ákimdiginde ótken otyrysta kóz jetkizgenimizdeı, jaman indettiń qyspaǵyna qaramaı elimizdiń teristiginde ekonomıkanyń barlyq salasy boıynsha ósim bar. Oblys ákimi bul dınamıka jyl sońyna deıin saqtalatynyna senim bildirdi.
Soltústik Qazaqstan oblysy
