Qazaqstan Respýblıkasy Parlamenti Senaty Tóraǵasynyń orynbasary Asqar Beısenbaev Vengrııa Memlekettik jınalysynyń Tóraǵasy Laslo Kıovermen kezdesti. Kezdesýdiń negizgi maqsaty eki el arasyndaǵy parlamentaralyq yntymaqtastyqty nyǵaıtý jáne zań shyǵarý máselelerin talqylaý boldy, dep habarlady Senattyń baspasóz qyzmeti.
Qazaqstan Respýblıkasy Parlamenti Senaty Tóraǵasynyń orynbasary Asqar Beısenbaev Vengrııa Memlekettik jınalysynyń Tóraǵasy Laslo Kıovermen kezdesti. Kezdesýdiń negizgi maqsaty eki el arasyndaǵy parlamentaralyq yntymaqtastyqty nyǵaıtý jáne zań shyǵarý máselelerin talqylaý boldy, dep habarlady Senattyń baspasóz qyzmeti.
Kezdesý barysynda A.Beısenbaev eki eldiń zań shyǵarý organdary ózara is-qımyldyń barlyq salalarynda ekijaqty yntymaqtastyqty ulǵaıtýǵa belsendi qatysýy tıis degen pikir bildirdi. Sondaı-aq, ol Qazaqstan Parlamentiniń qyzmeti men qurylymy týraly áńgimeledi jáne qazaqstandyq parlamentshiler EQYU, Eýropa Keńesi jáne NATO Parlamenttik assambleıalaryna qatysý aıasynda vengrlik áriptesterimen kópjaqty baılanystardy damytýǵa múddeli ekenin atap ótti.
L.Kıover parlamentshiler arasyndaǵy yntymaqtastyqty údetý jaıynda aıta kelip, eki el arasynda áriptestik baılanystardy odan ári ilgeriletý úshin berik irgetas qalyptasqanyn jetkizdi.
Parlamentshilerdiń el ishindegi qoǵamdyq-saıası ahýal qalyptastyrýǵa ǵana emes, tutastaı halyqaralyq úderisterge áser ete alatynyn atap óte kelip, A.Beısenbaev Qazaqstannyń 2017-2018 jyldarda BUU Qaýipsizdik Keńesiniń turaqty emes múshesi bolý týraly ótinishin ilgeriletýge Memlekettik jınalystyń járdemdesýin ótindi.
«Qazaqstan buryn BUU Qaýipsizdik Keńesiniń múshesi bolǵan joq, degenmen, halyqaralyq kún tártibiniń eń jaýapty jáne kúrdeli salalarynda mol tájirıbesi bar. Elimizdiń birqatar aımaqtyq jáne jahandyq úderisterge tyǵyz aralasýy bizge san-salaly aqparattarǵa jáne BUU Qaýipsizdik Keńesiniń aldynda turǵan halyqaralyq qaýipsizdik máselelerin sheshýdiń túrli joldaryna ıe bolýdyń tamasha múmkindigin berip otyr», – dep atap ótti Senat Tóraǵasynyń orynbasary.
Kezdesý barysynda ekonomıka jáne mádenı-gýmanıtarlyq salalardaǵy ekijaqty yntymaqtastyq máseleleri talqylandy.
Kezdesýge sondaı-aq Qazaqstan Respýblıkasynyń Vengrııadaǵy Tótenshe jáne ókiletti elshisi Nurbah Rústemov, senatorlar Serik Aqylbaı, Svetlana Jalmaǵambetova, Vladımır Bobrov jáne Májilis depýtaty Andreı Begeneev qatysty.
