"Qashyqtan jumyspen qamtý – bul bizdiń zor bolashaǵymyz. Birinshiden, bul halyq úshin belgili bir artyqshylyqtar jasaıdy, atap aıtqanda: erkin jumys isteý rejımi, kıim izdeýdiń qajetsizdigi, otbasymen qarym-qatynas jasaýǵa ýaqyttyń moldyǵy jáne t.s.s. Onyń ústine bolashaqta adam jasaıtyn qıyn jumystardy oryndaıtyn tehnologııalardyń paıda bolýy da sózsiz, al keńsedegi zııatkerlik jumystardy oryndaıtyn qyzmetkerler mindetti túrde qashyqtan jumys jasaý rejımine aýysady. Alaıda tehnologııalardyń damýy, tórtinshi ónerkásiptik revolıýsııa, sıfrlandyrýǵa kóshý bilikti mamandardyń rólin joǵarylatýdy qajet etetinin túsiný kerek", deıdi Georgıı Ostapkovıch, "Ekonomıka joǵary mektebi" Ulttyq zertteý ýnıversıtetiniń dırektory.
Búgingi tańda mamandardyń kópshiligi jumysynan aıyryldy nemese qashyqtan jumys isteýge kóshti, erteńgi kúni jaǵdaıdyń qalaı ózgeretinin boljaý qıyn. Alaıda pandemııa – sizdiń ómirge degen, tańdaǵan mamandyǵyńyzǵa degen kózqarasyńyzdy qaıta qarastyrýǵa, barlyq úırengen daǵdylaryńyzdy saraptap shyǵýǵa nemese jańa tájirıbe jınaqtaýǵa, sóıtip karantınniń sońynda suranysqa ıe mamandyq boıynsha qaıta daıarlanýǵa múmkindik beretin kezeń.
О́zin-ózi oqshaýlaý ýaqytyn qalaı tıimdi paıdalanýǵa bolady? Munyń eń basty sheshimi – ózdiginen bilim alý, ıaǵnı joǵary bilimi men mamandyǵy bar túlekter úshin de, kolledjdi bıyl bitirgender úshin de tamasha sheshim bolýy múmkin. Qashyqtyqtan jumys isteıtinderdiń kópshiliginde birshama bos ýaqyt paıda boldy, al jańa bilim bolashaqta kásibı jetistikke jetýge jáne mansaptyq ósýge jaqsy kómek bolatyny sózsiz. Ol úshin Sizge birneshe nusqalardy qarastyrý kerek: ınternettegi tálimgerlik onlaın-kýrstary, ýnıversıtette onlaın rejıminde oqý jáne qashyqtyqtan ózdiginen oqý.
Pandemııaǵa baılanysty jýyq arada ýnıversıtetterde kez kelgen oqý qashyqtyqtan bastalatyny belgili. Eger siz kolledj bitirgen bolsańyz nemese joǵary bilimińiz bola tura, basqa mamandyq alýdy oılap júrseńiz, onda bakalavr dárejesiniń ornyna ekinshi joǵary bilim alý ońtaıly bolatynyn qarastyrǵanyńyz jón, eń bastysy – bul qarjylyq jaǵynan tıimdirek.
Ekinshi joǵary bilim alý arqyly siz, bir jaǵynan, qarajatyńyz ben ýaqytyńyzdy únemdeısiz, ekinshi jaǵynan, qashyqtyqtan bilim berýdiń rettelgen júıesi boıynsha sapaly bilim alasyz. Birneshe jyldan beri ekinshi joǵary bilim alý negizgi qyzmetke esh kedergi jasamaı, qashyqtyqtan oqý formatynda júrgizilip kele jatqanyn aıta ketý kerek. Sondyqtan bul prosess óte ońtaılandyrylǵan jáne durys jolǵa qoıylǵan, ıaǵnı oqý baǵdarlamasynda eshqandaı kemshilikter nemese kásibı muǵalimder men basqa resýrstardyń jetispeýshiligi baıqalmaıdy. Trımestr formatynda 1,5 nemese 2,5 jyldyq oqý merzimi ýaqytty edáýir únemdeýge múmkindik beredi, sóıtip oqý ýaqytyn qysqartýǵa jáne onyń prosesin basqarýǵa múmkindik beredi.
"Jumys isteı otyryp, bilim alý jáne alǵan bilimdi tájirıbede qoldaný arqyly biliktilikti arttyrý óte yńǵaıly. Qashyqtyqtan oqý – oqıtyn pánderge árqashan da erkin túrde qol jetkizý, tańdalǵan mamandyq boıynsha karantın kezinde biliktilikti arttyrý múmkindigi, al tipti keıbireýler úshin – qarjylyq múmkindikterin jaqsartý maqsatynda basqa mamandyqty tańdaý múmkindigi", dep túsindirdi ekinshi joǵary bilim alý boıynsha ekinshi kýrsta oqyp júrgen stýdent Serik Ospanov.
