Jambyl oblysynda jańa oqý jylyna daıyndyq jumystary óte álsiz bolyp shyqty. Áýelgide daıyndyq sharalaryna baılanysty tıisti basshylarǵa birqatar tapsyrma berilgenimen, onyń deni oryndalmaǵan.
Oblystyq bilim basqarmasynyń basshysy Gúlnár Hodjabergenovanyń aıtýynsha, búgingi tańda óńirde 22 bilim berý nysanynyń qurylysy júrgizilýde. Al onyń ishinde 9 bilim nysany bıyl salynyp bitýi kerek eken. Qurylys jumystaryna 10,1 mlrd teńge bólingen. Sondaı-aq 7,7 mlrd teńgege 42 mektep kúrdeli jóndeýden ótýde. Bilim basqarmasy basshysynyń keltirgen málimetine qaraǵanda, oblystaǵy 32 mekteptiń jóndeý jumystary bıyl 30 tamyzǵa deıin, al qalǵan 6 bilim oshaǵyndaǵy kúrdeli jóndeý jumystary tek 30 qyrkúıekte ǵana aıaqtalmaq. Iаǵnı jańa oqý jylynyń bastalǵanyna az ǵana ýaqyt qalǵanyna qaramastan, jumystar keshiktirilýde. Bul rette oblys basshylyǵy tarapynan aýdan ákimderine syn da aıtylǵan bolatyn. Aýdan ákimderi óz aýdandaryndaǵy mektep qurylysynyń jaıyn jiti baqylap otyrǵan joq. Sonymen qatar merdigerlerdiń de sylbyr jumysy jańa oqý jylyna daıyndyqqa qolbaılaý boldy. Sondyqtan da mektepteri áli paıdalanýǵa berilmegen balalar qalanyń shalǵaıynda ornalasqan mektepterge baryp oqýǵa májbúr. Alaıda oblystyq bilim basqarmasynyń basshysy Gúlnár Hodjabergenova nysandardyń qurylysy men jóndeý jumystarynyń sozylyp ketýin jumysshylardyń jetispeýshiligimen túsindirdi. Al oblys ákimi Berdibek Saparbaev atalǵan másele boıynsha ótken jıynda mektep qurylysyna jáne kúrdeli jóndeýge baılanysty jaǵdaılar áýelden-aq oblystyq qurylys basqarmasy men aýdandyq qurylys bólimderiniń baqylaýynda bolýy kerek ekenin aıtqan bolatyn. «Eger jumys barysyn qadaǵalamasa, tehnıkalyq qadaǵalaý ne úshin qajet? Jalpy tapsyrmalar ne úshin beriledi? Eger qurylys basqarmasy óz jumysyn júrgize almasa», degen edi ákim.
Bilim berý salasyndaǵy taǵy bir mańyzdy másele – syrttaǵy mektep dárethanalaryna qatysty. Byltyr Taraz qalasynda oryn alǵan oqýshy qyzdy zorlaý áreketinen keıin osyndaı sheshim qabyldanǵan bolatyn. Oblys ákiminiń tapsyrmasy boıynsha, onyń bári bıyl 1 qyrkúıekke deıin mektep ǵımarattaryna engizilýi kerek bolǵan. Bul maqsatqa 1,1 mlrd teńge bólingen. Biraq osy ýaqytqa deıin oblys mektepterine qatysty 285 dárethananyń teń jartysy ǵana kóshirilgen bolyp shyqty. Bul oraıda Baızaq, Qordaı, Merki jáne Shý aýdandary aıtarlyqtaı artta qalyp otyr. Atalǵan aýdandarǵa aqshanyń jetkilikti deńgeıde bólingenine qaramastan, jumys sylbyr júrgizilýde. Sondaı-aq dárethanalardyń talapqa saı salynbaýy da qatań synǵa ushyraýda. «Men aýdan ákimderiniń qalaı tynysh uıyqtaıtynyn túsinbeımin. Olardyń ornynda bolsam, jeltoqsan aıynda balalardyń kún saıyn kóshe dárethanalaryna qalaı baratyndaryn oılanatyn edim. Bul balalardyń aldynda uıat», degen bolatyn B.Saparbaev. Sonymen qatar oblystaǵy barlyq mektepterge beınekameralar ornatý da kún tártibindegi máseleniń biri bolyp otyr. Búgingi tańda óńirdegi bilim berý oshaqtaryndaǵy beınekameralardyń 80 paıyzy eskirgen. Endi ony sandyq kameralarǵa aýystyrý máselesi tur.
Al bıyl jańa oqý jylynyń basynda qashyqtan oqytý tártibi bolǵandyqtan, oqýshylardy kompıýtermen qamtamasyz etý de mańyzdy máseleniń biri. Oblystaǵy 234 myń 715 oqýshynyń tek 57,4 paıyzynda ǵana derbes kompıýter men noýtbýk bar. Al 99 myń 852 oqýshynyń, ıaǵnı olardyń 42,5 paıyzynyń kompıýterlik tehnıkasy joq bolyp otyr. Jyl basynan beri oblys mektepteri úshin 2 658 kompıýter satyp alynǵan. Endi jyl sońyna deıin 30 myńnan astam kompıýter satyp alý josparlanýda. Sonymen qatar oblystyń 130 eldi mekeni ınternetpen qamtylmaǵan. Al ınternetsiz eldi mekenderde 123 mektep bar. Onda 18 myń 937 oqýshy oqıdy. Bul da óńirdegi tıisti aýdan ákimderi men bilim salasy basshylarynyń jumysynyń júıesizdigin kórsetedi.
Jambyl oblysy
