Ulttyq ekonomıka mınıstri R. Dálenov, Ulttyq bank tóraǵasy E. Dosaev, Qarjy naryǵyn retteý jáne damytý agenttiginiń tóraǵasy M. Ábilqasymova, qarjy mınıstri E. Jamaýbaev, aýyl sharýashylyǵy mınıstri S. Omarov, ındýstrııa jáne ınfraqurylymdyq damý mınıstri B. Atamqulov, energetıka mınıstri N. Noǵaev, ishki ister mınıstri E. Turǵymbaev, ekologııa, geologııa jáne tabıǵı resýrstar mınıstri M. Myrzaǵalıev, eńbek jáne halyqty áleýmettik qorǵaý mınıstri B. Nurymbetov, densaýlyq saqtaý mınıstri A. Soı, bilim jáne ǵylym mınıstri A. Aımaǵambetov, sondaı-aq sıfrlyq damý, ınnovasııalar jáne aeroǵarysh ónerkásibi mınıstriniń mindetin atqarýshy B. Mýsın baıandama jasady.
«Joldaýda alǵa qoıylǵan mindetterdi oryndaý ekonomıkanyń ornyqtylyǵy men básekege qabilettiligin arttyrý faktoryna aınalady. Memleket basshysy jańa jaǵdaıǵa sáıkes keletin memlekettik jáne ekonomıkalyq saıasatty ýaqytyly ázirleý boıynsha naqty is-qımyl josparyn belgiledi», — dedi A. Mamın.
Premer-Mınıstr halyqtyń ál-aýqatyn jaqsartý úshin ekonomıkany odan ári damytý boıynsha úlken mindetter júktelgenin atap ótti. Joldaýdaǵy tapsyrmalardy oryndaý básekege qabiletti naqty sektordy belsendi damytýdy jáne eksport qurylymyn ártaraptandyrýdy qamtamasyz etedi.
Sondaı-aq Joldaýdy iske asyrý strategııalyq mańyzdy salalardy memlekettik qoldaý sharalaryn keńeıtýge yqpal etedi. Qazaqstandyq úlesti arttyrý boıynsha jańa usynystar daıyndap, agroónerkásiptik keshendi damytýdyń jańa baǵdarlamasyn ázirleý qajet. Úkimet basshysy bıýdjettik josparlaýdyń jańa júıesi ulttyq basymdyqtardy qamtamasyz etip, josparlaý júıesiniń bir bóligine aınalýy tıis ekenin atap ótti. Sonymen qatar bıýdjetten tys qorlardy eskere otyryp, «keńeıtilgen bıýdjetti» engizý kerek. Tikeleı jáne portfeldik ınvestısııalardy tartý, otandyq taýarlar men qyzmetterdiń eksportyn ilgeriletý maqsatynda «Astana» halyqaralyq qarjy ortalyǵynyń alańy paıdalanylady.
«Joldaýdyń basty maqsaty – turǵyn úıdiń qoljetimdiligine, qolaıly otbasylyq-demografııalyq jaǵdaılarǵa, jaqsy ekologııaǵa, qoljetimdi ári sapaly bilimge, sondaı-aq densaýlyq saqtaý júıesine negizdelgen azamattardyń áleýmettik ál-aýqatyna baǵyttalǵan», — dedi A. Mamın.
Premer-Mınıstr Memleket basshysynyń Joldaýy memlekettik basqarýdyń jańa modelin qalyptastyrýǵa, kadr saıasatyn, sheshim qabyldaý jáne olardyń oryndalýy úshin jaýapkershilik júıesin qaıta qaraýǵa baǵyttalǵanyn atap ótti. Halyqtyń ál-aýqatyn arttyrý úshin ekonomıkany odan ári damytý boıynsha úlken mindetter qoıyldy. Memleket basshysy Joldaýynyń barlyq baǵyttaryn iske asyrý boıynsha bıylǵy 7 qyrkúıekke deıin Jalpyulttyq jospar ázirlenip, Prezıdenttiń bekitýine engiziledi. Úkimet basshysy Prezıdenttiń árbir tapsyrmasynyń oryndalýyna qatań baqylaý ornatylyp, naqty oryndalý merzimi men jaýapty adam belgilenýi tıis ekenin atap ótti.
«Bizde Memleket basshysynyń Joldaýyn tolyq ári ýaqytyly iske asyrý úshin barlyq qajetti resýrstar men quraldar bar», — dedi A. Mamın.
