Aldaǵy kúnderi kún buzylyp, jaýyn-shashyn kedergi keltirmese, barlyq egis alqaptarynda jıyn-terim naýqany 25 qyrkúıekte aıaqtalady dep habarlady Aqtóbe oblysynyń aýylsharýashylyǵy basqarmasy basshysynyń orynbasary – Asylhan Abtıev.
Úsh-tórt jyldan beri qysta qardyń az túsýi, jerde tońnyń qatpaýy, kóktemgi jaýyn-shashynnyń az bolýy qatty qýańshylyqqa soqtyrǵandyqtan, dıqandardyń eńbegi zaıa ketip, egis egýge jumsaǵan shyǵyndaryn óteı almaı, qaryzǵa batyp keldi.
Bıylǵy kóktemde egiletin daqyldardyń ár túrliligine basymdyq berilip, Áıteke bı, Hromtaý, Mártók, Qarǵaly, Qobda aýdandarynda 445 myń gektar jerge dándi daqyl, 46 myń 200 gektarǵa maıly daqyl, 104 myń gektarǵa mal azyǵy, negizinen jońyshqa, arpa dáni sebilgen bolatyn. Sondaı-aq óńir sharýalary 3310 gektar jerge kókónis, 1500 gektarǵa baqsha daqyldaryn da ekti.
Boljamdy túsimi 450 myń tonnadan asady dep jobalanǵan bıylǵy astyq óńirdegi 7 elevatorda saqtalady dep josparlanyp otyr. Onyń ekeýi Aqtóbe qalasynda, 5 elevator Áıteke bı, Qarǵaly, Mártók, Hromtaý, Qobda aýdandarynda ornalasqan. Qoldanystaǵy jeti elevatordyń syıymdylyǵy 395 myń tonnaǵa laıyqtalǵan.
Budan ózge óńirdegi jeke sharýashylyqtardyń menshiginde 184 astyq saqtaıtyn qoıma bar. Bıylǵy kúzde óńir sharýashylyqtary 4217 gektar jerge qara bıdaı egip tastamaqshy. Aıta ketý kerek, sońǵy 15-20 jyldan beri óńirde kúzdik bıdaı egý múlde umytylǵan edi.
