Qazaqstandaǵy memlekettik josparlaý júıesi táýelsizdik alǵannan beri jahandyq tájirıbelerge sáıkes únemi jetilýde. Qazirgi tańda eldiń áleýmettik-ekonomıkalyq damýynyń negizgi maqsatyna jetýge baǵyttalǵan memlekettik josparlaý júıesiniń normatıvti-quqyqtyq jáne ádistemelik negizi qalandy. Strategııalyq jáne baǵdarlamalyq qujattar, strategııalyq josparlar men aýmaqtardy damytý baǵdarlamalary ázirlenip, iske asyrylýda. Qujattardyń tıimdiligin arttyrý maqsatynda olarǵa júıeli túrde monıtorıng jáne baǵalaý júrgizilip otyr. Sonymen birge nátıjege baǵyttalǵan bıýdjettendirý qaǵıdattary engizilýde.
Memlekettik josparlaý salasyndaǵy júrgizilip jatqan reformalarǵa qaramastan áli de sheshimin tappaǵan birqatar máseleler bar. Atap aıtsaq, strategııalyq jáne bıýdjettik josparlaýda úılesimniń jetkiliksizdigi, qujattardy ázirleý jáne baǵalaý prosesterine halyqtyń belsendi qatyspaýy, qujattar sanynyń kóptigi. Bul máselelerdiń barlyǵy eldiń strategııalyq maqsattaryna jetýine kedergi keltirýde. Sondaı-aq memlekettik basqarý júıesiniń tıimdiligin tómendetýi múmkin.
Osy oraıda Prezıdent Joldaýynda aıtylǵan Strategııalyq josparlaý jáne reformalar agenttigin qurý ýaqtyly sheshim bolyp tabylmaq. Qazirgi tańda ishki jáne syrtqy syn-tegeýrinderge baılanysty álemdik jáne ulttyq ekonomıkada bolyp jatqan ózgerister Qazaqstanda ekonomıkany damytý boıynsha jańa reformalar men bastamalar talap etýde. Bul rette strategııalyq josparlaý máseleleri boıynsha Prezıdentke baǵynyshty jeke memlekettik qurylymnyń bolýy eldegi memlekettik josparlaý júıesiniń mańyzdylyǵyn arttyrady. Sonymen birge «Halyq únine qulaq asatyn memleket» qaǵıdasy adamdardyń ómir súrý deńgeıin arttyrýǵa alyp keletin sapaly ekonomıkalyq ósýdi josparlaýǵa múmkindik beredi.
Gúlnar ShAǴAMBAEVA,
Qazaqstannyń jeke jumyspen qamtý agenttikteri qaýymdastyǵynyń dırektory
