Konferensııaǵa ǵalymdar, manasshylar, QHA etnomádenı birlestikteri men Eýrazııalyq shyǵarmashylyq gıldııasynyń músheleri qatysty. ZOOM baǵdarlamasynda ótken sharaǵa "Qyrǵyzstan – Astana" qoǵamdyq birlestiginiń tóraǵasy Shavkat Ismaılov tóraǵalyq etti.
Onlaın jıynda aldymen sóz sóılegen Nur-Sultan qalasynyń QHA Hatshylyǵynyń meńgerýshisi Lázzat Qusaıynova Dostyq úıinde ashylǵan "Jyr ortalyǵy" elorda ómirindegi mańyzdy oqıǵa ekenin atap ótti. Sondaı-aq ortalyqtyń halyqaralyq deńgeıge shyǵyp jatqanyna qýanyshty ekenin aıtyp, konferensııa jumysyna sáttilik tiledi.
Sonan soń sharanyń moderatory, Qazaq ulttyq óner ýnıversıtetiniń professory, jyraý Almas Almatov "Manas" eposy dúnıejúzilik mádenıettiń altyn qoryna qosylǵan adamzatqa ortaq muranyń biri ekenin atap ótti.
"Epostyń zerttelýi týraly qazaq jazýshysy Muhtar Áýezov 1961 jyly óziniń eńbeginde keń kólemde toqtaldy. Qazaqstanda "Manas" 1961 jyly qyrǵyzdyń halyq batyrlyq dastany retinde 4 tom bolyp basylyp shyqty. Sodan beri "Manas" qazaq pen qyrǵyzdyń, búkil túrki halyqtary men barsha adamzattyń ortaq murasyna aınaldy. Sondyqtan búgingi konferensııanyń kótergen júgi de, alǵa qoıǵan maqsaty da eki halyqtyń dostyǵy, tarıhı tamyrlastyǵy bolsa deımiz", dedi A.Almatov.
О́z kezeginde Qyrǵyzystan tarapynyń moderatory, "Manas" jáne Shyńǵys Aıtmatov ulttyq akademııasynyń manastaný bóliminiń meńgerýshisi Tashmanbet Kenensarıev jyrdyń kólemine álemde birde-bir epıkalyq eskertkish teńese almaıtynyn atap ótti.
"Máselen, Saǵymbaı Orozbaqovtan jazyp alynǵan jyrdyń kólemi 250 myń joldan turady. Bul Fırdoýsı "Shahnamasynan" 2 ese, Gomerdiń "Ilıadasynan" 16 ese kóp. Buǵan Saıaqbaı Qaralaevtan jazyp alynǵan Manastyń balasy men nemeresi sýretteletin "Semeteı", "Seıtek" jyryn qossańyz aqyndyqtyń aıshyqty qudiretin tanı alasyz. Jalpy, jyrdyń barlyq nusqalaryn jınaqtasaq, shamamen 3 mıllıon jolǵa jetedi", dedi T.Kenensarıev.
Odan keıin sóz sóılegen Eýrazııa shyǵarmashylyq gıldııasy tóraǵasynyń orynbasary Marat Ahmetjanov gıldııanyń 2015 jyldan beri eposty álemge nasıhattaýda atqarǵan sharalaryna toqtalyp, "Manas" fenomeni áli de tereń zertteýdi qajet etetinin atap ótti.
Sonymen qatar konferensııada QR mádenıet qaıratkeri, aqyn Baıanǵalı Álimjanov epostyń zerttelý tarıhy, oǵan úles qosqan qazaq ǵalymdary týraly baıandama jasap, jyrdan úzindi oqydy. "Manas" jáne Shyńǵys Aıtmatov ulttyq akademııasynyń prezıdenti Topchýbek Týrgýnalıev "Manas" jáne qyrǵyz halqynyń álemdik mádenıettiń epıkalyq qazynasyna qosqan úlesi» taqyrybynda baıandama jasady. Sondaı-aq "Manas-Mýras" qoǵamdyq qorynyń atqarýshy dırektory, Qyrǵyz
Respýblıkasy Jazýshylar odaǵynyń múshesi, manasshy Rysbaı Isakov "Manas" eposynan úzindi oryndady.
Shara sońynda qatysýshylar manastaný máseleleri, "Manas" eposyn myńjyldyqtyń shejiresi retinde nasıhattaý týraly oı qozǵady. Konferensııa Eýrazııalyq shyǵarmashylyq gıldııa múshesi B.Álimjanovtyń "Skaz stoletnego stepnıaka" kitabynyń tusaýkeserimen qorytyndylandy.
