Foto: Ulttyq statıstıka bıýrosy (arhıv)
Búgingi tańda jalpy ınvestısııa kólemi 52,7 mlrd dollardy quraıtyn 177 jobadan turatyn pýl quryldy, onyń ishinde 22,4 mlrd dollarǵa baǵalanǵan 122 joba iske asyryldy, jalpy quny shamamen 10 mlrd dollarǵa taǵy 24 joba iske asyrylý satysynda, sondaı aq 20,3 mlrd dollar somasyna baǵalanǵan 31 perspektıvaly joba pysyqtaldy.
Shyn máninde, Qazaqstan men Reseı qazirgi ýaqytta tehnologııaǵa, lokalızasııaǵa jáne joǵary qosylǵan qun ónimderin birlesip óndirýge negizdelgen ónerkásiptik yntymaqtastyqtyń jańa modelin ázirlep jatyr. V.Pýtınniń Qazaqstanǵa sapary jańa birlesken kásiporyndardy iske qosýǵa qosymsha serpin beredi jáne eki eldiń ónerkásiptik áleýetin odan ári nyǵaıtady dep kútilip otyr.
Eń iri mysaldardyń biri – Qazaqstan men Reseı arasyndaǵy úkimetaralyq kelisim sheńberinde iske asyrylyp jatqan «EvroHım» hımııalyq kesheni. Joba jylyna 600 myń tonnaǵa deıin mıneraldy tyńaıtqyshtar men 800 myń tonna kúkirt qyshqylyn óndirýdi kózdeıdi jáne azyq-túlik qaýipsizdigi men onymen baılanysty salalardy damytý úshin strategııalyq mańyzdy bolyp sanalady.
Qazaqstan men Reseı ónerkásiptik yntymaqtastyqtyń jańa modelin ázirlep jatyr
Qostanaıdaǵy «KamAZ» JAQ-pen birlesken kásiporyn KamLitKZ mashına jasaý salasynda erekshe oryn alady. Bul kommersııalyq kólikterge arnalǵan avtomobıl komponentteriniń zamanaýı, joǵary tehnologııalyq óndirýshisi. Avtomattandyrý jáne tehnologııalyq sheshimder turǵysynan kásiporyndy Germanııadaǵy eń iri, kelesi býyn qozǵaltqyshtaryna arnalǵan komponentter shyǵaratyn Daimler zamanaýı óndiris alańdarymen salystyrýǵa bolady.
Tengri Tyres kompanııasynyń «Tatneft» JAQ-pen birlesken «Attar» otandyq brendimen shına shyǵarý jobasy da belsendi damyp keledi. Kompanııa qazirdiń ózinde jylyna 3,5 mln shına óndirý josparlanǵan qýatymen Qazaqstandaǵy jalǵyz eksportqa baǵyttalǵan shına óndirýshisine aınaldy.
Taý-ken ónerkásibin 2007 jyly Reseıdiń mys kompanııasy iske qosqan Aqtóbe mys kompanııasy usynady. Onyń qazirgi óndiris kólemi jylyna 4,8 mln tonna kendi quraıdy, bul 2 332 jumys ornyn qurýǵa jáne sońǵy 5 jylda shamamen 18 mlrd teńge ınvestısııa tartýǵa múmkindik beredi, bul ónerkásiptik yntymaqtastyqtyń praktıkalyq áseri men uzaq merzimdi sıpatyn kórsetedi.
Munymen qosa, qazirgi ýaqytta mashına jasaý jáne qurylys materıaldaryn óndirý salasynda birqatar jobalar iske asyrylý satysynda, olardy 2026 jáne 2028 jyldar aralyǵynda aıaqtaý josparlanyp otyr. Olardyń qataryna aýyl sharýashylyǵy tehnıkasyn óndirýdi jergiliktendirý boıynsha Kazrost Engineering jáne «RostSelMash» jobalary, «SemAZ» JShS men «GAZ» JShQ birlesken avtomobıl óndirisi, Almaty oblysynda «TEHNONIKOL» korporasııasymen birlesip jylý oqshaýlaǵysh materıaldar óndirisi jáne Qaraǵandy oblysynda «Zavod Tehno» JShQ-men birlesip iske asyrylatyn zamanaýı, joǵary tıimdi jylý oqshaýlaǵysh materıaldaryn óndirýge arnalǵan Karaganda Insulation jobasy kiredi.
Eske salaıyq, keshe Reseı Prezıdenti Vladımır Pýtın Qazaqstanǵa memlekettik saparmen keldi. «Egemen Qazaqstan» gazetinde Vladımır Pýtınniń «Reseı – Qazaqstan: Eýrazııa tórindegi odaq» atty maqalasy jarııalandy.
