Oǵan qala ákimi Murat Áıtenov jáne jeke ınvestorlar men sharýaqojalyq ıeleri qatysty. Atalǵan agro-ındýstrııaldy aımaq Abaı aýdanyndaǵy saýda-logıstıkalyq ortalyq mańynda ornalasqan. Aýmaǵy 136 gektardy quraıdy.
Jylyjaılardyń qurylysy 2 kezeńdi qamtıdy. Atap aıtqanda I–kezeńde 2020 – 2021 jyldar aralyǵynda 30 gektar aýmaqqa ónerkásiptik jylyjaı kesheni salynady.
9,4 mlrd teńgeni quraıtyn bul jobany "Taza Onim" ShQ, "AIDI Agro Trade" JShS, "Kolesnıkov" JK, "ASM Corporation" JShS, "High Yield" JShS, "Tatybaeva" JK, "Kaz Agro Treıd" JShS, "Nur Alem Agro" JShS sekildi ınvestorlar júzege asyrady.
Al II – kezeńde 2022 – 2025 jyldar aralyǵynda 60 gektarǵa ónerkásiptik jylyjaı kesheniniń qurylysy júrgziledi. Onda 20 joba júzege asyrylatyn bolady. Jobanyń jalpy quny - 21,0 mlrd teńge.
Atalǵan jylyjaı keshenderi tolyǵymen iske qosylǵanda bir myńnan asa adam jańa jumys ornymen qamtamasyz etiletin bolady.
