Aımaqtar • 10 Qyrkúıek, 2020

Almatylyq kishkentaı Leıla qujatyn alýǵa keldi

8 ret kórsetildi

Kishkentaı Leıla búgin ata-anasymen birge "Azamattarǵa arnalǵan úkimet" memlekettik korporasııasy Almaty qalasy Medeý aýdandyq HQO-ǵa birinshi ret keldi, dep habarlaıdy Egemen.kz.

Ata-anasy qyzyna tólqujat jasatyp, shetelge saıahatqa shyqpaq. HQO-daǵy aǵa-apalary oǵan qurmet kórsetip, syılyqtar usyndy. О́miriniń alǵashqy qadamdary osyndaı qýanysh pen shattyqtan bastalyp jatqan kishkentaı arý, aldaǵy ómiriniń barlyq sátin osylaı elestetedi. Sebebi, aınalasy sondaı jarqyn sátter syılap otyr.

"Azamattarǵa arnalǵan úkimet" memlekettik korporasııasy Almaty qalasy fılıalynyń mamandary balalardyń ǵana emes, qyzmet alýǵa kelgen árbir janǵa jylýlyq syılap, kóńilderin tabýǵa tyrysady. Qazirgideı kúdigi men úmiti qatar turǵan almaǵaıyp kezeńde qamkóńilderge, bir sáttik bolsa da qýanysh syılap, kúdigin seıiltýge qyzmet etýde.

Qaladaǵy kez kelgen HQO-larǵa bara qalsańyz, qyzmet alyp, jańa qujatqa ıe bolyp jatqan azamattarǵa qurmet kórsetip, tipti syılyq jasap jatqan HQO mamandaryn kezdestiresiz.    

Jetisý aýdanynyń túrǵyny, úshinshi toptaǵy múgedektigi bar Qaırat Ábilev te óziniń týǵan kúni ekenin HQO-ǵa kelip, qyzmet alyp otyrǵanda bildi. Qaırattyń qujatyn rásimdep jatqan operator, áriptesterimen birge oryndarynan turyp, qol soǵyp qurmet kórsetti.

"Men únemi osy qajettiligi bar jandarǵa arnalǵan terezeden qyzmet alamyn. Mamandar kishipeıil, izetti, qurmetterin aıamaıdy. Búgingi qurmetteri tipten erekshe boldy", - deıdi tańdanysyn jasyrmaı.   

"Joly bolǵysh jandardy jaqsy kórem. О́zimdi de solardyń qatarynanmyn dep esepteımin", - deıdi Dınara esimdi boıjetken. Búgin kámelet jasyna tolǵan jeke kýáligin alýǵa kelgen eken.  "Mundaı qurmetti kútpegen edim. Qýanyp turmyn. Muny aldaǵy ómirime aq jol dep jorydym. Túrksib aýdandyq HQO mamandaryna alǵysym sheksiz", - deıdi ol.

"Myna kórinis syrttan qaraǵan adamǵa da qýanysh syılaıdy eken. Ortalyq qyzmetkerleri qoldaryna shar, shaǵyn syılyqtaryn alyp, alǵashqy ret qujat, ıaǵnı pasport, jeke kýálik syndy qujat túrlerin alyp jatqan azamattarǵa syılap jatyr. Keremet emes pe!? Qyzmet alýshylar da, olarǵa qurmet kórsetýshi mamandar da máz! Dál qazirgi ýaqytta mundaı qarym-qatynas kerek-aq", - deıdi Bostandyq aýdandyq front-ofısten qyzmet alýǵa kelgen Aıdana Kárimova.

"Azamattarǵa arnalǵan úkimettiń barlyq front-ofıs qyzmetkerleri qyzmet alýǵa kelgen azamattarǵa erekshe kózqaraspen qyzmet kórsetýde. Olarǵa bir sáttik bolsa da qýanysh syılap, kóńilderin kóterýge tyrysýdamyz. Muny HQO-nyń jańa dástúri desek te bolady. Maqsatymyz – árbir janǵa jylý syılaý. Adamdardyń bári kóńildi júrse, ómirimiz de nurlanyp, bar qıyndyq umytylmaı ma?!", – deıdi "Azamattarǵa arnalǵan úkimet" memlekettik korporasııasy Almaty qalasy fılıalynyń dırektory Danııar Qyryqbaev.

 

ALMATY

Sońǵy jańalyqtar

Uqsas jańalyqtar