Atyraý polıseıleri zańsyz jolmen bekire balyǵyn aýlaǵan eki er adamdy qolǵa túsirdi.
8 qyrkúıek kúni Polısııa departamentiniń Balyq qoryna qylmystyq qol suǵýshylyqpen kúres bóliminiń qyzmetkerleri Jaıyq ózenindegi reıdtik is-sharalar barysynda Orman sharýashylyǵy jáne janýarlar dúnıesi ınspeksııasynyń qyzmetkerlerimen birlesip (ryboohrana) “Yamaha-40” aspaly qozǵaltqyshy bar Býdarka qaıyǵyn toqtatty.
Tekserý kezinde qaıyqtaǵy Damba aýylynyń 36 jastaǵy eki turǵynynan eki qapqa salynǵan jalpy salmaǵy 60 kelige jýyq bekire tuqymdas balyqty, sondaı-aq 40 keli sazan men aý-tor tárkilenip alyndy.
Qazirgi ýaqytta eki azamat ýaqytsha ustaý ornynda. Sotqa deıingi tergep-tekserý Qylmystyq kodekstiń 335-baby (Balyq resýrstaryn, basqa da sý janýarlaryn nemese ósimdikterin zańsyz alý) boıynsha júrgizilýde.
