"Bıznestiń jol kartasy" baǵdarlamasy boıynsha elorda ákimdiginen grant alýǵa arnalǵan bıznes-jobalardy qaraý kezeńi aıaqtalýda. Bıyl baıqaýǵa berilgen 599 ótinimniń 563-i qaraldy.
"Búgin "Bıznestiń jol kartasy" sheńberinde grant alýǵa úmitker jobalardy baıqaý komıssııasy qaraýynyń sońǵy kúni. Aptanyń basynan beri 443 joba qaralyp, 120-sy qaldy. Baıqaýǵa 563 joba qatysýda. Barlyǵy qala turǵyndarynan 599 ótinish berildi, biraq sonyń 36-sy baǵdarlama sharttaryna sáıkes kelmegendikten qatysýdan shekteldi", dedi elordalyq ınvestısııalar jáne kásipkerlikti damytý basqarmasynyń kásipkerlikti damytý bóliminiń bas mamany Ádilet Tilepov.
Jobalar baıqaýǵa qatysýshylar daıyndaǵan beınerolıkter men bıznes-josparlarǵa sáıkes baǵalanady. Bıyl konkýrstyq komıssııanyń barlyq otyrystary onlaın rejimde ótip, YouTube arnasynda tikeleı efırde kórsetiledi. Barlyq jobalardy qarap shyqqannan keıin komıssııa músheleri upaılardy esepteıdi. Nátıje men grant ıegerleriniń aty-jóni kelesi apta ishinde belgili bolady.
Esterińizge sala keteıik, bıyl "Bıznestiń jol kartasy" sheńberinde granttyq qarjylandyrýǵa 260 mıllıon teńge bólindi, sonyń 60 mıllıony 30 jasqa deıingi kásipkerlerge arnalǵan. Bul rette, grant mólsheri 2-den 5 mıllıon teńgege deıin belgilendi.
Aıta keteıik, "Bıznestiń jol kartasy" baǵdarlamasy Qazaqstanda 2010 jyldan beri jumys isteıdi. Onyń bir baǵytyn ákimdikter qadaǵalaıdy. Jergilikti atqarýshy organdar bızneske granttar men ınfraqurylymdyq qoldaý arqyly kómek kórsetedi. Grant berý konkýrstaryna kásipkerler de, óz isin ashqysy keletin qazaqstandyqtar da, onyń ishinde áıelder, múmkindigi shekteýli jandar men 50 jastan asqan adamdar da qatysa alady.
