Foto: Vahid Salemi / AP
Sondaı-aq Iranǵa jasalǵan shabýylǵa AQSh-tyń qatysy bar ekeni týraly aqparat tarady. Bul málimetti Izraıl Qorǵanys mınıstrliginiń ókili rastady. Onyń aıtýynsha, operasııa birneshe aı boıy josparlanǵan, al bastalý kúni birneshe apta buryn belgilengen.
Prezıdent rezıdensııasyna soqqy jasaldy
Soqqylar Iran prezıdenti Masýd Pezeshkıannyń rezıdensııasyna, Islam revolıýsııasy saqshylary korpýsynyń barlaý shtabyna jáne Tegeran áýejaıyna baǵyttalǵan. Málimetterge sáıkes, Pezeshkıan qazir qalada emes. Eldiń Joǵarǵy kóshbasshysy Alı Hameneı de Tegeranda emes – ol qaýipsiz jerge kóshirilgen.
Qazirgi ýaqytta Iran men Izraıl áýe keńistigin japty. Izraıl Tegeran tarapynan jaýap retinde soqqy kútilýine baılanysty tótenshe jaǵdaı jarııalady. Mektepterdegi sabaqtar toqtatyldy, jumys oryndaryna barýǵa da tyıym salyndy. Turǵyndarǵa panalaý oryndaryna barý usynyldy.
Tegerannyń shyǵys jáne batys bólikterinde uıaly baılanys jelileri óshirilgen, keıbir aýdandarda ınternet baılanysy álsiregen. Jarylystar sondaı-aq Isfahan qalasynda (onda ıadrolyq nysandardyń biri ornalasqan), Lýrestan provınsııasynda, sondaı-aq Tebrız, Kým, Keredj jáne Kermanshah qalalarynda da estilgen.
AQSh-ta Iranǵa soqqy jasaýdyń maqsaty aıtyldy
Áýe soqqylarynyń maqsaty – Irannyń qaýipsizdik júıesin álsiretý. Bul shabýyl 2025 jyldyń maýsym aıyndaǵy oqıǵalarǵa qaraǵanda aýqymdyraq bolýy múmkin.
AQSh tarapynyń ókili ondaǵan amerıkalyq soqqylar Taıaý Shyǵystaǵy bazalarda ornalasqan shabýyldaýshy ushaqtarmen, sondaı-aq bir nemese birneshe áýe tasymaldaýshy kemelerden jasalyp jatqanyn málimdedi.
Izraıldik sheneýniktiń aıtýynsha, AQSh pen Izraıldiń birlesken soqqylary keminde tórt kúnge sozylady. Operasııa birneshe kezeńge josparlanǵan.
«Tegeran endi burynǵydaı bolmaıdy», dedi ızraıldik sheneýnik.
Málimetterge sáıkes, Izraıl men AQSh-tyń Iranǵa soqqy jasaýy AQSh prezıdenti Donald Tramptyń ıadrolyq baǵdarlama jónindegi kelissózderge kóńili tolmaýynan keıin oryn alǵan.
