Baǵdarlama tórt raýndtan turdy: jańa Konstıtýsııa normalaryn túsindirý, júrgizýshilerdiń saýaldaryna jaýap berý, halyqtan kelgen beınesuraqtarǵa jaýap berý jáne úndeý.
Dıskýssııa alańynda táýelsizdik pen ulttyq birlik, ulttyq valıýta, derbes derekter, halyqaralyq sharttar men jer, «Mıranda» erejesi sııaqty jańa Konstıtýsııa jobasyna engen normalar týraly aıtyldy.
Birinshi raýndta partııa ókilderi jańa Konstıtýsııa jobasyna túsindirme jumystaryn júrgizdi.
Onyń barysynda «AMANAT» partııasynyń ókili Aıdos Sarym ulttyq kodtyń saqtalýy el táýelsizdigi úshin mańyzdy ekenin aıtty.
«Jahandaný zamanynda ózge elden ózgesheligimizdi, ulttyq kodymyzdy saqtap qalý mańyzdy. Bizdiń dástúrimiz, tilimiz ben dinimizdi saqtaı bilsek qana memlekettiń irgetasy berik bolady», dedi Aıdos Sarym.
«Aýyl» partııasynyń tóraǵasy Serik Egizbaev jańa Konstıtýsııa jobasynyń 8-babynyń 3-tarmaǵyna toqtaldy. Depýtat jer qoınaýyndaǵy baılyqtan túsetin tabys halyq ıgiligine, aýyl ınfraqurylymyna, jol men mektepke jumsalýy kerektigin aıtty.
«Jańa Ata zań jobasynda jerdiń halyqqa tıesili ekeni anyq jazyldy. Bul – sol baılyqtan túsetin tabys halyq ıgiligine, aýyl ınfraqurylymyna, jol men mektepke jumsalýy kerek degen sóz», dedi Serik Egizbaev.
Sondaı-aq pikir almasýǵa qatysýshylar birinshi raýndta Egemendik, ekologııa, adam quqyqtary máselesin de taldady.
Ekinshi raýndta spıkerler jańa Konstıtýsııajobasyndaǵy baptardy taldap, saraptady. Qoıylǵan suraqtarǵa jaýap berdi.
«Baıtaq» partııasynyń tóraǵasy Azamathan Ámirtaevtyń aıtýynsha, 37-bap azamattardy tabıǵatty qorǵaýǵa mindetteıdi. Al 8-bapta menshik ıeleri óz múlkin qoǵam múddesine jáne ekologııalyq talaptarǵa saı paıdalanýy tıis ekeni naqty kórsetilgen dep atap ótti.
«Buryn ekologııalyq normalar deklaratıvti sıpatta bolsa, endi olar naqty ári aıqyn bekitildi. Qorshaǵan ortany qorǵaý – árbir qazaqstandyqtyń konstıtýsııalyq jaýapkershiligine aınalady. Bul memlekettiń ekologııalyq jáne áleýmettik jaýapkershiligin ınstıtýsıonaldy turǵyda kúsheıtedi», deıdi Azamathan Ámirtaev.
«Aqjol» partııasynyń tóraǵasy Azat Perýashev syrtqy kelisimderdiń ulttyq múddege sáıkestigi qatań baqylaýdan ótýi kerektigin aıtty.
«Halyqaralyq sharttardy ratıfaksııalaýǵa deıin ony tekserý quzireti Konstıtýsııalyq Sottyń rólin kúsheıtedi. Sondaı-aq bul memlekettik múddeni buzýǵa jol bermeıtin talap», dedi Azat Perýashev.
Qazaqstan Halyq partııasynyń múshesi Asylbek Nuralınniń aıtýynsha, Jańa Konstıtýsııa jobasynda partııanyń erekshe maquldaýymen eńbek quqyǵyn bekitý týraly norma qabyldandy. Iаǵnı, joba eńbekti quqyq jáne eń mańyzdy qoǵamdyq qundylyq, al eńbekkerlerdiń áleýmettik qorǵalýyn memlekettiń mindeti retinde bekitedi.
Dıalogtyń úshinshi raýndynda partııa ókilderi turǵyndar joldaǵan saýaldarǵa jaýap berip, jańa Ata Zań jobasyn túsindirdi. О́z kezeginde «Respublica» partııasynyń múshesi Ekaterına Smolıakova jańa Konstıtýsııa jobasynyń 21-babyna toqtaldy. Atalǵan bapta azamattardyń derbes derekterin qorǵaý týraly jazylǵan.
«Qoldanystaǵy Konstıýsııada jeke ómirge qol suǵýǵa bomlaıtyny týraly normalar bar bolǵanymen, sıfrlyq ortadaǵy quqyqtaryn qorǵaıtyn normalar joq. Al jańa Ata zań jobasyna sıfrlyq derekterdi qorǵaý máselesi engizildi», dedi Ekaterına Smolıakova.
Jalpyulttyq sosıal-demokratııalyq partııasynyń múshesi Nurlan Áýesbaevtyń aıtýynsha, Ata Zańda otbasy men neke uǵymdarynyń naqty aıqyndalýy – qoǵamdaǵy dástúrli qundylyqtardy quqyqtyq deńgeıde bekitýdiń kórinisi. Jańa Konstıtýsııada neke, otbasy, ana, áke jáne balanyń memleket qorǵaýynda ekeni naqty kórsetilgen. Bul – otbasy tek áleýmettik uǵym emes, memlekettiń qorǵaýyndaǵy mańyzdy ınstıtýt ekenin bildiredi dedi ol.
Referendým jáne jańa Konstıtýsııa: Halyq kóp jınalatyn oryndarda aqparattyq jumys jandandy
Partııaaralyq dıalogtyń tórtinshi raýndynda ár partııa ókili óz úndeýin joldady.
Stýdııalyq formattaǵy pikirtalas Qazaqstan telearnasynyń YouTube, Facebook, Instagram, TikTok platformalarynda jáne «Habar» arnasynyń YouTube arnasynda tikeleı efırde kórsetildi.
Beıbitkúl Sársemhanqyzy: Respýblıkalyq referendým – Qazaqstannyń jańa belesi
