Telegram arnalarynyń jazýynsha, Iran 47 jyl boıy Amerıkaǵa qarsy uran aıtyp, Taıaý Shyǵysta túrli qarýly toptardy qoldap otyrǵan. Donald Tramp 1983 jyly Lıvan astanasy Beırýtte amerıkalyq áskerılerge jasalǵan shabýyldy jáne sońǵy jyldary aımaqta AQSh kúshterine qarsy bolǵan kóptegen shabýyldardy eske aldy. Sondaı-aq Iran qoldaıtyn HAMAS-tyń 7 qazanda Izraılge jasaǵan shabýylyn mysalǵa keltirdi.
Prezıdenttiń sózinshe, basty qaýip – Irannyń ıadrolyq baǵdarlamasy men alys qashyqtyqqa ushatyn zymyrandar jasaý áreketi. Onyń pikirinshe, mundaı qarý bolashaqta AQSh-tyń odaqtastaryna ǵana emes, tipti Amerıka aýmaǵyna da qaýip tóndirýi múmkin.
Tramp Iran eshqashan ıadrolyq qarýǵa ıe bolmaýy kerek aıtty. Ol AQSh Irannyń zymyran óndirisin álsiretip, áskerı áleýetine soqqy beretinin jetkizdi.
«Biz Irannyń ıadrolyq qarýǵa ıe bolýyna jol bermeımiz. Bul – óte qarapaıym úndeý. Olar eshqashan ıadrolyq qarýǵa qol jetkizbeıdi», dep qosty ol.
Sonymen qatar, ótken jyly Irannyń ıadrolyq nysandaryna jasalǵan shabýyldan keıin de Tegeran ıadrolyq baǵdarlamasynan bas tartpaǵanyn atap ótti. Onyń sózinshe, AQSh bul joly óz qaýipsizdigin qamtamasyz etý úshin batyl áreket jasap otyr.
Aıta keteıik, Izraıl 28 aqpan, senbi kúni tańerteń Iranǵa aldyn ala soqqy jasady. Shabýyldy eldiń qorǵanys mınıstri Israel Kas rastady. Tegeran qalasynda keminde úsh jarylys boldy.
Sondaı-aq Air Astana áýe kompanııasy 28 aqpannan bastap Taıaý Shyǵys baǵytyndaǵy barlyq reısterdiń toqtatylǵanyn málimdedi.
