Jýyrda oblys ákimi Qumar Aqsaqalov oblystyń astyqty óńirleriniń biri – Ǵabıt Músirepov aýdanyna baryp, astyqtyń sapasyn kórdi. Bul aýdandaǵy astyq shyǵymdylyǵy ózgelerge qaraǵanda bıyl da joǵary. Burynǵy Kókshetaý oblysynyń qysqarǵan úsh aýdanynyń negizinde quralǵan aýdannyń astyq alqaptarynyń kólemi de úlken. Oblys ortalyǵynan 300 shaqyrymdaı qashyqta jatyr.
Bıyl aýdan dıqandary 712 myń gektar jerge dán sińirgen. Qazir shyqqan ónimniń 70 paıyzyn jınap aldy. Byltyr aýdan basshylyǵyna buryn eki aýdandy tabysty basqarǵan Aǵzam Tastemirov barǵan bolatyn. Tájirıbeli basshy munda da jumysty dóńgelentip jiberdi. Aýdan ortalyǵyndaǵy 45 kóshe jóndelip, 50 shaqyrymdaı jol salyndy. 8 aýylǵa aýyz sý tartyldy. 9 mektep jóndeýden ótti. Aýdanda turǵyn úı salý qarqyny da joǵary. Máselen, oblys ákimi Qumar Aqsaqalovtyń saparynda 52 páterli úlken turǵyn úı paıdalanýǵa berildi. Oblys ákimi qonys toı ıelerine páter kiltin tapsyrdy, sondaı-aq kópbalaly otbasyna kórimdik esebinde kir jýatyn mashına syılady. Al atbasyn burǵan Nejınka aýylynda bıyl 10 úı salynǵan. Mundaǵy «Astyq-Prıvolnoe» JShS 6,5 myń gektar jerge astyq ósiredi. Mal sharýashylyǵyn da damytý ústinde. Qazir jobasy 1,5 mlrd teńge turatyn taýarly sút fermasyn salyp jatyr. Ferma qurylysy aldaǵy jyldyń sáýir aıynda aıaqtalady.
Oblys basshysy osy aýyldaǵy dıqandarmen kezdeskende Prezıdent Q.Toqaevtyń jańa Joldaýynda alǵa qoıyp otyrǵan mindetteri týraly aıtty. «Aldaǵy bes jylda eńbek ónimdiligin 2,5 ese arttyrý alǵa qoıylyp otyr. Biz bul mindetti tolyq oryndaı alamyz. Bul úshin jerdiń kútimin arttyryp, mıneraldy tyńaıtqyshtar sebýdi ulǵaıtý kerek. Biz bıyl 130 myń tonnadaı mıneraldy tyńaıtqyshtar septik. Osynyń ózi respýblıka boıynsha aldyńǵy orynda tur. Alaıda aldaǵy bes jylda onyń kólemin jyl saın 200 myń tonnaǵa jetkizýimiz kerek. Sonymen qatar bıdaıdyń joǵary ónimdiligin beretin suryptar alamyz. О́nimdiligi joǵary jańa tehnıkalar alýdy arttyramyz. Bıyl 1,5 mlrd teńgege tehnıkalar satyp alyndy. Aldaǵy jyldarda bul sandy kóbeıte túsetin bolamyz. Sonymen birge astyq tasymalyndaǵy shyǵyndardy azaıtý úshin joldar da jóndele túsedi. Mine, osy jumystardy sapaly ári joǵary deńgeıde júrgizetin bolsaq, Prezıdent alǵa qoıǵan mejege jetemiz. Bul qolymyzdan keledi», dedi ol.
Jalpy aıtqanda, bıylǵy astyq orý naýqany qalypty jaǵdaıda ótip jatyr. Dıqan eńbegi jemisti bola tússe, eldiń de tabysty bolary sózsiz.
Soltústik Qazaqstan oblysy
