Seriktestiktiń bas dırektory Altynbek Saparov – jomart júrekti azamat. Ol byltyr «Jyl mesenaty» ataǵymen marapattalǵan. Týǵan aýyly kirse shyqqysyz bolyp jaınap tur. Árbir úıge aýyz sýy tartylǵan, kósheler asfalttanǵan. Aýyldaǵy jumysy qaınap jatqan FAP, 200 oryndyq klýb, jarqyraǵan mektep úıi men sport alańdaryn kórgende bul aýyldy jerdiń jumaǵy ma dersiń. Birneshe jańa úıler de salynǵan. Túngi jaryqta samaladaı bolyp jaınap turady.
Buryn «Krasnyı partızan» dep atalǵan osynaý qazaq aýylynyń atyna osy jerdi mekendep, elge bılik júrgizgen Noǵaıbaı aqsaqaldyń atyn alyp bergen de Saparovtar áýleti. Noǵaıbaı – Altynbektiń arǵy atasy. Elge syıymdy, ádiletti, aqylgóı bı bolǵan. Tekti tulǵanyń esimin nemereleri qaıta jańǵyrtty.
Bıylǵy jaman indetpen kúreste Altynbek Saparov belsendilik tanytyp, aldymen oblystyq aýrýhanaǵa 2,5 mln teńge kóleminde kómek berdi. Odan keıin «Zerde» qoǵamy uıymdastyrǵan halyqqa kómek berý qoryna 500 myń teńgemen úles qosty. О́zi oblystyq máslıhattyń depýtaty. Qashan kórseń júzinen nur tógilgen azamat uzaq jyldan beri aýyl sharýashylyǵy ónimin óndirýmen aınalysady. Tabıǵı tektilik onyń óne boıynan esip, úlkenge izetpen, kishige qurmetpen turady.
«Noǵaıbaı» JShS-nyń egis kólemi 12 myń gektardaı. Bıyl sonyń 7 myń gektaryna bıdaı egilgen. Bıylǵy ystyqtyń, jaýyn-shashynnyń az bolýyna qaramaı kútimdi jerdiń astyǵy jaqsy ónim berip jatyr. Jerge tyńaıtqyshtar mol sebilgen, gerbısıd shashý ýaqtyly júrgizilgen. Tańǵy shyqtyń paıdasy da egiske óz paıdasyn tıgizgen. Sonyń nátıjesinde osy kúni gektar berekesi 19 sentnerden aınalýda. Sharýashylyq arpa, suly jáne maıly daqyldar da egedi. Mal ósiretindikten 300 gektar jerge súrlemdik azyq ekken.
Qazirgi aýa raıynyń qolaılyǵynda ár kúndi tıimdi paıdalanǵan sharýashylyq tehnıkalary kúndiz-tún astyq basynda júr. Sonyń ishinde joǵary sapaly 18 kombaın, astyq tasymaldaıtyn on shaqty júk avtomobıli men tirkemeli traktorlar egistik dalasy men qyrman arasynda úzdiksiz sabylýda.
Altynbek Seıpiluly úlken oraqty aldaǵy 5-6 kúnde tolyq aıaqtaıtynyn aıtty.
«Aýa raıy osylaı tursa oraqty tolyǵymen aıaqtaýǵa jaqynbyz. Endi tek eńbegimizdiń jemisin kórsek boldy. Bıyl bıdaıdyń úshinshi klasynyń baǵasy 88-90 myń teńgeden aınalyp tur. Bul az emes bolǵanymen gerbısıdter men tyńaıtqyshtardyń qymbattaýyna baılanysty budan da kóbirek bolsa, tipti jaqsy bolar edi», deıdi ol.
Sharýashylyq turǵyndarǵa paı berýde de jomarttyq tanytady. Mundaǵy turǵyndardyń jer úlesi – 4 gektardan bolǵan. Soǵan bes sentnerdiń aqshalaı balamasy beriledi. Onyń ústine jergilikti turǵyndarǵa saban, shóp úıilip, jem de beriledi. Áıteýir, aýyl turǵyndary Altynbekke dán rıza.
Sharýashylyqqa Noǵaıbaı aýylymen qatar kórshiles Nadejka eldi mekeni de qaraıdy. Qazir eki aýyldaǵy barlyq turǵyndar arasynan sharýashylyq 80-deı adamdy jumyspen qamtyp otyr. Árıne, maýsymdyq jumystar aıaqtalǵan soń jumys oryndary qysqaratyny sózsiz. Biraq sharýashylyq basshysy tyńǵylyqty jumysshylaryn taratpaı, olarǵa basqa jumys taýyp berýge qam jasap júr.
Mine, Soltústiktegi qýatty sharýashylyqtardyń biriniń qysqasha aıtqandaǵy tynys-tirshiligi osyndaı.
Soltústik Qazaqstan oblysy,
M.Jumabaev aýdany
