Qorshaǵan orta lastanýynyń monıtorıngi synaq zerthanasynyń basshysy Erbol Orazalın ózennen alynǵan sý synamasy zerthanada qalaı tekseriletini jaıynda sóz etti. Onyń aıtýynsha, sý obektilerinen synamalar aı saıyn alynyp otyrady. Tek sáýir aıynda sý deńgeıiniń kóterilýine baılanysty sý sapasy eki ret taldaýdan ótedi. Jyl saıyn alynatyn 13 monıtorıngtiń nátıjesi birqalypty deńgeıde saqtalady. Ár monıtorıng barysynda sý sapasynda aıtarlyqtaı ózgerister bolmaıdy.
"Synama alý kezinde sý temperatýrasy ólshenip, zerthanaǵa jetkiziledi. Onda onyń organıkalyq quramy, aýyr metaldardyń bolýy, tuzdyń quramy zertteledi. Taldaý qorytyndysy bir táýlikte belgili bolady. Biz birneshe jyldan beri Esil ózenine monıtorıng júrgizip kelemiz. Munda sý quramynda aıtarlyqtaı ózgerister bolǵan joq. Elordada biz baqylaıtyn 7 sý qoımasy jáne synama alatyn 20 oryn bar. Árıne, bizdiń sý aıdyndary eń taza sý aıdyny emes ekenin moıyndaýymyz kerek. Biraq ruqsat etilgen shekti konsentrasııa mólsherden aspaıdy", dedi Erbol Orazalın.
Onyń aıtýynsha, sý sapasynda ózgeristerdiń bolmaýy bizde sýdy lastaıtyn iri zaýyttar men kásiporyndardyń joqtyǵymen baılanysty. Eger sý quramyndaǵy keıbir kórsetkishter qalyptan asyp ketken bolsa, onda atalǵan zerthana derekterdi Tótenshe jaǵdaılar departamenti men Nur-Sultan ákimdiginiń Ekologııa departamentine jiberedi. Budan soń, olar sý quramyn qalypqa keltirý josparyn ázirlep, tıisti sharalar júrgizedi.
Aıta keteıik, Qazaqstan boıynsha jalpy sý synamalary "Qazgıdromettiń" 17 fılıalynda tekseriledi.
Búkilálemdik sýǵa monıtorıng júrgizý kúni 2003 jyldan bastap jyl saıyn 18 qyrkúıekte atalyp ótedi. Ekologııalyq mereke adamdardyń ózderi turatyn jerdegi, ǵalamshardaǵy sý resýrstary problemasy týraly habardar bolyp otyrýyna, olardy tabıǵatty lastanýdan saqtaý sharalaryna jumyldyrýǵa baǵyttalǵan.
