Qala ákimi Bolat Jumabekov jýyrda ǵana qysqa daıyndalý múmkindigi tómen úılerdi aralap, turǵyndarmen kezdesti.
«Qysqa daıyndyqta páter ıeleri kooperatıvteriniń basshylaryna ǵana qarap otyra berýge bolmaıdy. Árbir turǵyn bul iske belsendi aralasýy kerek. Myna úıde PIK te qurylmaǵan. Ystyq sýdyń qysymyn tekserýge de úı daıyn emes. Sondyqtan bárińiz birlesip, qysymdy tekserýge dereý aqsha jınaýlaryńyz kerek», dedi ol Maıakovskıı kóshesindegi №93 úıdiń aýlasynda turǵyndarmen kezdeskende.
Al úıdiń PIK-siz, qoǵamdyq negizde saılanǵan basshysy G.Dáribaeva turǵyndardyń qysymdy teksertýge qajetti 35 myń teńgeni jınap bere almaı otyrǵanyn aıtty. Ákimmen kezdesýge kelgender mundaı jaıbasarlyqty qoıyp, ózge emes ózderi úshin dereý aqsha jınaýǵa ýádelerin berip tarqady. Barlyǵy 140 páterdeı bolatyn úıdiń aınalasy 35 myń teńgeni jınap bere almaı otyrǵany aqylǵa syımaıtyn is. G.Dáribaeva turǵyndardyń áli de masyldyq pıǵylda ekenin aıtty.
«Bizge ákimdik istep berýleri kerek», deıdi turǵyndar. «Seniń páteriń jekemenshik, nege saǵan ákimdik jasap berýge tıis», dep olarmen únemi talasyp jatamyn», deıdi ol.
Jalpy, Petropavl qalasynda 1 090 kópqabatty úı bar. Sonyń 1022-sinde búginge deıin sý qysymyna daıyndyq tekserildi. Qalǵan úıler ákimdiktiń qadaǵalaýyna alynyp, ondaǵy jumystyń tezirek atqarylýy tekserilýde. Tek qana daıyndyq pasporty qoldarynda turǵan úılerge ǵana jylý beriledi dep jylý ortalyǵy da qulaqtandyrýlaryn ilýden tanar emes.
Qala ákimdigi 2019-2020 jyldardaǵy qysqy maýsymda jylý boıynsha túsken aryz-shaǵymdardy tekserip, onda kórsetilgen olqylyqtar boıynsha shara belgileýde. Barlyq 179 shaǵymdy kótergende bıyl da sol úılerdiń 74-inde byltyrǵy jaǵdaı jalǵasyp kele jatqany anyqtaldy. Bul úıler sý qysymyn tekserýge asyǵar emes, áli kúnge daıyndyq pasporttaryn almaǵan. Mine, osy úıler ákimdiktiń qatań qadaǵalaýyna alynǵanynyń nátıjesinde 42 úıde qysymdy tekserý júrgizildi.
Joǵaryda aıtqanymyzdaı, ortalyqtan jylytylatyn 1022 úı jylý qabyldaýǵa daıyn bolyp, pasporttaryn aldy. Bul barlyq úıdiń 93,3 paıyzy degen sóz. Byltyrǵy sáıkes merzimmen salystyrǵanda, bul – ozyq kórsetkish. Byltyr dál osy ýaqytta 723 kóp qabatty úı ǵana daıyndyq sapyna qoıylǵan edi. Demek, bıylǵy daıyndyq byltyrdan 27,4 paıyzǵa joǵary bolyp otyr. Daıyndyq jumystary 20 qyrkúıekte aıaqtalady dep belgilengen. Keıingi úsh jylda ol 23 qyrkúıekke deıin sozylyp, jylý berý maýsymy úsh kúnge keshiktirilýde. Qyrkúıektiń qara sýyǵy jedel túsip ketse, bul kúnderi jas balasy jáne qart adamdary bar úıler búrseń qaǵady.
Qalaǵa jylý beretin «Petropavl jylý júıeleri» JShS jylý berý maýsymyna negizinen daıyn. О́zderiniń baǵdarlamasyna sáıkes olar jylý berýdi aldymen balabaqshalar, emdeý jáne oqý oryndarynan bastaıdy. Sodan keıin qalanyń shaǵyn aýdandarynan bastap jylý beredi. Bıyldyń jylý baǵasyn monopolııaǵa qarsy komıtet g/kallorııasyna 2 740 teńge kóleminde bekitken.
«Petropavl jylý júıeleri» JShS bıyl 14 shaqyrym jylý berý júıelerin jańartýdy josparlaǵan. Qazir sonyń negizgi bóligi aıaqtaldy. Biraq ózderi aldaǵy ýaqytta jańartý jumystaryn arttyrý qajettigin aıtady. Bir aıtarlyǵy, seriktestik ókilderi bekitilgen tarıftiń tym tómen ekendigin alǵa tartady. Máselen, kásiporynnyń bas dırektory Andreı Kalınıchev jylý júıelerindegi barlyq jabdyqtardyń 70 paıyzǵa, magıstraldyq júıelerdiń 76 paıyzǵa tozǵandyǵyn aıtady.
«Biz jyl saıyn kem degende 18,4 shaqyrymnyń qubyrlaryn aýystyrýymyz kerek. О́kinishke qaraı, biz búgingi tarıfpen bul jumystardy atqara almaımyz», deıdi ol.
Qalaı desek te elimizdiń Soltústik qaqpasy qys maýsymyn qarsy alýǵa negizinen daıyn dep aıta alamyz.
Soltústik Qazaqstan oblysy
