Qazannyń 3-i kúni WBA jáne IBO belbeýleriniń 72,6 kıloǵa deıingi salmaqtaǵy ıesi Gennadıı Golovkın óziniń osy ataqtaryn toǵyzynshy márte qorǵady. Ol AQSh-tyń Nıý-Iork qalasyndaǵy ataqty «Medıson skver garden» sport kesheninde amerıkalyq Kertıs Stıvenspen qolǵap túıistirdi. Qazaqstandyq kásipqoı boksshy uzyn sany 12 raýndqa shaqtalǵan shaıqastyń 8-bóliginde tehnıkalyq nokaýtpen jeńiske jetti. Sóıtip, ol bıylǵy jyly ótkizgen tórtinshi jekpe-jegin taǵy da utyspen aıaqtady.
Qazannyń 3-i kúni WBA jáne IBO belbeýleriniń 72,6 kıloǵa deıingi salmaqtaǵy ıesi Gennadıı Golovkın óziniń osy ataqtaryn toǵyzynshy márte qorǵady. Ol AQSh-tyń Nıý-Iork qalasyndaǵy ataqty «Medıson skver garden» sport kesheninde amerıkalyq Kertıs Stıvenspen qolǵap túıistirdi. Qazaqstandyq kásipqoı boksshy uzyn sany 12 raýndqa shaqtalǵan shaıqastyń 8-bóliginde tehnıkalyq nokaýtpen jeńiske jetti. Sóıtip, ol bıylǵy jyly ótkizgen tórtinshi jekpe-jegin taǵy da utyspen aıaqtady.
Ádettegideı bul jekpe-jektiń aldynda da qaýyrt qarbalasqa kezek berildi. Bul joly da bolǵaly turǵan kezdesýdiń ózegine aldyn ala maı quıýǵa umtylýshylyq kórinis tapty. Sol «qyzdy-qyzdy» qolpashtardyń bir qolatynda eki boksshynyń da «tilderi shyqty». Osy tusta óz sý búrkýshileriniń «órmegine» túsip qalǵan Kertıs Stıvens tipti Gennadıı Golovkınniń beıitin qazýǵa bara jatqanyn da aıtyp saldy. Biraq qansha jerden qarsylasynyń úreıin týǵyzyp, qutyn qashyryp, mysyn basý úshin aıtylǵanymen, bul málimdemeniń artyqtaý estilgeni anyq edi. Sebebi, qapelimde kóldeneń kelgen kók attynyń kókparyna aınala salatyndaı bizdiń baǵlan da ońaı shaǵylar jańǵaq emes-tin. Sonda da bolsa Gena shamyna tıetin bul sózderge asa qatty shamyrqana qoıǵan joq. Ol ózine tán baısaldylyǵymen bárin rıngtegi shaıqastyń sheshetinin aıtyp, toqtaı qoıdy. Alaıda, sóz qaǵystyrý soraby munymen de tynbady. Sol kezde Gennadıı aldaǵy shaıqasty naǵyz kósheniń tóbelesine aınaldyryp jiberetinin aıtyp, árýaq shaqyrdy. Osy sózdiń ospaǵynda: «Bul shaıqasta mindetti túrde nokaýt bolady. Men ázirge ony kimniń jasaıtynyn bilmeımin. Bul – boks. Alaıda, ózimniń nokaýtqa jibergim keledi», – degendi bir shıratyp ótti.
Aqyrynda kútken kún de keldi. Báseke Astana ýaqytymen jeksenbi kúni 7 saǵat 45 mınýtta «Qazaqstan» telearnasynan tikeleı efırde bastaldy. Birden aıtyp qoıaıyq, shaıqastyń aldynda eshkim de Kertıs Stıvensti basty favorıt sanaǵan joq. Sonymen birge, ony álsizder qataryna da qosqan eshkim bolmady. Qazir jasy 28-degi boksshy osy kezge deıin kásipqoılar rınginde 28 urys ótkizip, onyń 18-in nokaýtpen támamdapty. Biraq 3 ret jeńilistiń ashy dámin tatqany taǵy bar. Buǵan qaraǵanda, 31 jastaǵy Gennadıı Golovkınniń kórsetkishi áldeqaıda joǵary. Ol sol shaıqasqa deıin sharshy alańǵa 27 ret kóterilip, bárinde de mereıi ústem bolǵan. Jáne bulardyń 25-inde urysty merziminen buryn bitirgen.
Boksshylar bul jolǵy shaıqasqa osyndaı júktemelerimen keldi. Qazaqstannan óz jerlesterine qoldaý kórsetý úshin Serik Sápıev bastaǵan kóptegen jankúıer bardy. Solardyń dýyly qanattandyrǵan Gennadıı birden arystandaı aqyryp, alǵa atyldy. Osy arqyly Kertısti áýelden arqan boılap qashýǵa májbúr etti. Munda Genanyń sol qolmen keremet jumys jasaıtyny jedel basymdyq alyp bere bastady. Onyń joıqyn shabýylynan qorǵanǵysy kelgen Kertıs sát saıyn básekelesiniń sol qolymen japyra urǵan qarsy soqqysyna túsip qalyp jatty. Gena ara-tura oń qolymen de qaqyrata shalyp ótip turdy. Birinshi mınýttyń sońynda osyndaı eki soqqy amerıkalyq atletti teńseltip jibergendeı boldy. Osy tusta urys bastalmaı jatyp, aıaqtalyp qalatyndaı bolyp kóringen.
Golovkın segizinshi raýndty ózinen kóp utylyp júrgen qarsylasyn birjola iske alǵysyz etip tastaýǵa degen umtylyspen bastady. Biraq tózimdiligine teben boılamaıtyn Kertıs áriptesiniń kezektese soqqan soqqysynan basyn eki jaqqa qaraı bulǵańdata júrip, bul raýndty da aıaǵymen tik turyp aıaqtady. Sol betimen gong estilgende, óz buryshyna bettedi. Onyń aıaǵyn áreń súıretip kele jatqan qalpyna, álemtapyryq bolyp ketken bet-júzine sol kezde qaraı qalǵan sekýndanttary bárin de túsindi...
Jeńis Gennadıı Golovkınge osylaı keldi. Munyń atyn «tehnıkalyq nokaýt» deıdi. Osylaısha, 28-shi urysynda 28-shi márte jeńiske jetken Gena ádetinshe qazaqtyń oıýly shapanyn kıip, alań ortasynda turdy. Al osy jeńisi úshin oǵan 400 myń AQSh dollary tıesili bolsa, amerıkalyqqa 290 myń buıyrdy.
PS. Materıaldyń tolyq nusqasyn gazet saıtynan (news.egemen.kz) oqı alasyzdar.
Rýslan IGILIK.
