Sýretti túsirgen Erlan OMAR, «EQ»
Senat Spıkeri Máýlen Áshimbaev «Búgin – halyqaralyq tazalyq kúni. Osynaý úlken halyqaralyq bastamany memlekettik emes uıymdar kóterip, sońǵy 10 jyldan astam ýaqyt boıy búkil álemde qyrkúıek aıynyń ishinde osyndaı sharalar ótýde. Mysaly, ótken jyly halyqaralyq tazalyq kúnine 180 memlekette 20 mln-nan astam adam qatysqan. Búgin Ekologııa, geologııa jáne tabıǵı resýrstar mınıstrliginiń jáne elorda ákimdiginiń bastamasymen osyndaı jaqsy shara ótip jatyr. Bir jaǵynan turmystyq qatty qalyqtardan saıabaqtarymyzdy, kóshelerimizdi tazartsaq, ekinshi jaǵynan aǵash otyrǵyzýdamyz. Bul quptarlyq bastama. Jalpy, qorshaǵan ortany qorǵaý – bizdiń basty basymdyqtarymyzdyń biri. Prezıdentimiz Joldaýynda da osy máselege úlken kóńil bólgenin bilesizder», dedi.
«Bul – Prezıdent Qasym-Jomart Toqaevtyń Joldaýynda aıtylǵan orman alqaptarynda aǵash otyrǵyzý tapsyrmasyn oryndaýǵa baǵyttalǵan búkilhalyqtyq aksııanyń tek bastamasy. Aǵash otyrǵyzý el boıynsha áli jalǵasyn tabady. Negizinen osy jerde, elorda ortalyǵynda jańa park bolady. Bolashaqta bul aǵashtar sportshylardy jelden qorǵaıdy. Azamattar jıi keletin, demalýǵa yńǵaıly ári ádemi orynǵa aınalady. Qorshaǵan ortanyń jaqsarýyna áserin tıgizedi», dedi Ekologııa, geologııa jáne tabıǵı resýrstar mınıstri Maǵzum Myrzaǵalıev sharanyń ashylýynda.
Osy rette Máýlen Áshimbaev Memleket basshysy jyldyń sońyna deıin jańa Ekologııalyq kodeks qabyldaýdy tapsyrǵanyn, onda atalǵan saladaǵy problemalardy sheshýge qatysty sharalar qamtylatynyn atap ótti. Prezıdentimizdiń bastamasymen ormandarymyzda 2 mlrd-qa jýyq, qalalarda 15 mln aǵash otyrǵyzylatynyn eske saldy. «Bul – úlken bastama. Al búgin osynaý úlken bastamanyń tusaýkeseri elordamyzda ótip jatyr desek, artyq aıtqandyq emes. Jalpy, aldaǵy ýaqytta osy baǵytta kóp jumys atqarýymyz kerek. Zańdar da qabyldanýy tıis. Osy baǵyttaǵy jumysty depýtattar da jalǵastyrady. Qorshaǵan ortany qorǵaý tek memlekettik organdardyń maqsaty men mindeti emes. О́ıtkeni qoǵam men memlekettik organdardyń jumysyn biriktirgende ǵana jumys nátıjeli bolady. Sondyqtan árbir qazaqstandyq qorshaǵan ortaǵa degen jaýapkershiligin sezinýi tıis. Tabıǵat baılyǵyn qorǵaý, aıalaý, tabıǵatqa degen durys kózqaras – ata-babamyzdan sińgen qasıet. Qazaq halqy ejelden tabıǵatpen úılesimdi tirshilik etken», dedi Senat Spıkeri.
Sondaı-aq Máýlen Áshimbaev osy aptada Senat erekshe qorǵalatyn tabıǵı aýmaqtarǵa qatysty zań qabyldaǵanyn atap ótti. Bul qujat paıdalanylmaı bos jatqan jerlerdi Ile Alataýy tabıǵı parki men Býrabaı ulttyq parkiniń quramyna qaıtarýǵa múmkindik beredi. Jalpy, aldaǵy bes jylda Memleket basshysynyń tapsyrmasy boıynsha elimizdegi orman alqaptarynda 2 mlrd, eldi mekenderde 15 mıllıon aǵash otyrǵyzý josparlanyp otyr. Sondyqtan búgingi aksııany Prezıdent bastamasynyń alǵashqy nátıjesi retinde qarastyrýǵa bolady. Senat tóraǵasy mundaı kógaldandyrý jumystarynyń bereri mol jáne «World clean up day» sııaqty aksııalardyń búkil álem úshin mańyzy zor ekenin atap ótti.
Bıyl atalǵan shara búkil elimiz boıynsha ótkizilip jatyr. Shara barysynda eko-belsendiler aǵash otyrǵyzyp, qoǵamdyq oryndarda, saıabaqtarda jáne basqa da jerlerde tazalyq jumystaryn júrgizýde.
