Qazaqtyń birtýar aqyny, halyq jazýshysy Qadyr Myrza Áliniń týǵanyna bıyl 85 jyl. Osyǵan oraı aqynnyń qurmetine Qapshaǵaı qalasynda bıýst ornatylyp, "Qazaqtyń Qadyry" kitaptyń tusaýkeseri ótti.
Aqyn músini qoladan quıylǵan. Eskertkishtiń Qapshaǵaıda ashylýy tegin emes, óıtkeni dál osy jer aqyn Qadyr Myrza Áliniń týyp, ósken jeri Aq Jaıyqty eske salady. Bıýstiń ashylýyna aqynnyń jaqyndary, izbasarlary men zııaly qaýym ókilderi qatysty. Sharany Qadyr Myrza Áli atyndaǵy qoǵamdyq qory uıymdastyrǵan.
"Demalýǵa kelgen adamdar tek qana sýǵa shomylyp ketý úshin emes, qazaqtyń mádenıetimen sýsyndaýǵa, ádebıetimen jaqynyraq tanysýǵa osy demalys orny úlken jaǵdaı jasap tur ǵoı dep oılaımyz. Búgingi is-shara sonyń alǵashqy bastamasy dep esepteımin", dedi Qazaqstan Jazýshylar odaǵy basqarma tóraǵasynyń orynbasary, Qadyr Myrza Áli atyndaǵy qoǵamdyq qor keńesiniń tóraǵasy Mereke Qulkenov.
Aqyn kózi tirisinde óziniń 70 jyldyq mereıtoıynda "Maǵan túk te keregi joq, senseńiz" atty óleńin oqyp beredi. Sol sáti fotosýretke sátti túsip qalǵan eken. Músinshi aqyn beınesin sol sýretke qarap jasasa kerek.
"Bıýstti jasaýda men úshin aqynnyń ór minezin, kózqarasyn, halyqtyń adamy bolǵanyn durys jetkize bilý kerek boldy. Onyń eńseli beınesin, óleń oqyp turǵan sátin alyp shyǵýǵa kóp kóńil bóldim. Músin halyq kóńilinen shyǵady degen úmittemin", dedi músin avtory Tımýr Ermuhametov.
"Jalpy aǵalaryń skýlptýraǵa ózi kelip turǵan adam. Eshqandaı qıyndyqsyz jasaýǵa bolady. Bylaısha aıtqanda "tıpaj". Maǵan unady. Áýelde daıyn bolmaı turǵanda eskızin maǵan kórsetken. Eń daıyn bolǵandaǵysy osy, ózderińiz kórip tursyzdar. О́te keremet, kelisti, ádemi shyqqan", dedi Qadyr Myrza Áliniń jary Saltanat Myrzálıeva.
Budan bólek aqynnyń shyǵarmashylyǵy týraly shaǵyn kitap kórme ashylyp, demalys aımaǵyna shyrshalar egildi. Qadyr Myrza Álı 50-den astam poezııalyq jınaqtardyń, ádebı-synı jáne balalar kitaptarynyń avtory. Qazaq oqyrmandaryn álem halyqtarynyń jumbaqtarymen tanystyrǵan aýdarmashy. Onyń ólsheýsiz eńbegi keleshek enshisine máńgi mura bolyp qalary anyq.
