Atalǵan partııa serkesi «aýrýhanalardaǵy oryn jetispeý qaýpi jáne medısınalyq qyzmetkerler sanynyń azdyǵy ekinshi tolqynnyń ekpinin qaıtara almaıdy, bılik oǵan ázir emes» degen pikirin alǵa tartty.
Melanshon aıtsa aıtqandaı, qazirdiń ózinde Fransııadaǵy KVI óristeýi azaımaı tur. Densaýlyq saqtaý mınıstri Olıve Veran ótken aptada Lıon men Nıssada COVID-19-dyń qarqyndy juǵýyna baılanysty 10 adamnan artyq jınalýǵa ruqsat etilmeı, barlar men meıramhanalar jabylýy múmkin ekenin aıtty. Bordo, Marsel jáne Gvadelýpada da jaǵdaıdyń jaqsarmaı turǵanyna qynjylǵan O.Veran: «Biz aýrýhanalarǵa adamdardyń kóptep túsýiniń aldyn alyp, sanıtarlyq shekteý normalaryn qatańdatpasaq bolmaıdy», deıdi.
* * *
BUU Bas hatshysy Antonıý Gýterrısh 20 qyrkúıekte PBS telearnasyna bergen suhbatynda koronavırýs pandemııasy men klımat ózgerýi álem aldynda turǵan eki mańyzdy problema ekenin málimdedi.
Bas hatshy álemdi júrisinen jańyldyrǵan jańa vırýsqa qarsy vaksına shyǵarýda kóptegen memlekettiń daıarlyǵy baryn, alaıda olar óz eliniń halqyn ǵana qamtyǵysy keletinin, sondyqtan vaksına álem jurtshylyǵyna qoljetimdi bolýy tıis ekenin atap ótti. Ekinshiden, Antonıý Gýterrısh atmosferaǵa kómirqyshqyl gazynyń kóptep bólinýine alańdaýshylyq bildirip, 2050 jylǵa deıin aýa lastanýyn azaıtý adamzat aldyndaǵy asa mańyzdy mindet ekenin aıtqan. Sondaı-aq ol álemdegi eki alpaýyt memleket – AQSh pen Qytaı arasyndaǵy ekonomıkalyq teketirestiń de jaǵymsyz áserine toqtaldy.
* * *
Shvesııa úkimeti parlament aldyna 2021 jylǵy bıýdjet jónindegi zań jobasyn usyndy.
Bul bıýdjet jyldaǵydan aıryqsha. Koronavırýs indetiniń halyqqa tıgizgen zardabyn jeńildetýdi kózdegen bıýdjettik jobada jumyssyzdarǵa bólinetin qaýipsizdendirý somasy ulǵaıǵan. Al bul óz kezeginde eldiń az tabys tabatyn bóliginiń zeınetaqy jınaq qoryndaǵy qarajatyn da kóbeıtýge kómektespek.
Buǵan qosa jobada salyq mólsherin de kemitý kózdelgen. Bul – orta jáne shaǵyn tabystaǵy úı sharýashylyǵyn qoldaý. О́ıtkeni salyqtyń tómendeýi úılerinde otyryp, sharýasy arqyly kirisin ulǵaıtamyn deýshilerge naqty kómek kórinedi.
* * *
Úndistandyq ǵalymdar COVID-19-dy anyqtaıtyn Tata CRISPR atty jańa test jasap shyǵardy.
Kóne órkenıet besiginiń biri – Úndistan túbeginiń halqy pandemııanyń qysymyn qatty sezindi. Elde aýrý juqtyrǵandar sany 4,3 mıllıonnan asyp, bir kúnde 1133 adam kóz jumǵan.
Jańa testiń ereksheligi – vırýstyń genomdyq tizbegin tanı alatyn kúshke ıe. Arnaıy Cas9 atty beıimdelgen aqýyzdy paıdalanyp, COVID-19 týdyratyn vırýsty jazbaı tanıtyn testiń sezimtaldyq qasıeti 96 paıyzdy quraıdy. Qazirdiń ózinde bir kúnde jańa test kómegimen 92,6 myń adamnan vırýs anyqtalǵan eken.
* * *
Koronavırýstyń ekinshi tolqynynan qaýiptengen elder karantın engizip jatyr.
Jer-jahandy jaılaǵan jegi qarqynyn baıaýlatar emes. AQSh, Brazılııa, Úndistan, Reseı jáne Batys Eýropa men Latyn Amerıkasynyń kóptegen eli indet ilgen ilmekten jýyq mańda shyǵatyn túri kórinbeıdi. EO elderi arasynda Chehııa vırýs juqtyrýdan aldyńǵy orynǵa shyqsa, Ulybrıtanııa premer-mınıstri Borıs Djonson birikken koroldik azamattarynyń da indet juqtyrǵanyna alańdady. Ispanııada aýrý juqtyrýdan taǵy da rekordtyq kórsetkishter tirkelip jatyr. Qalaı degende de, ekinshi tolqyn kóp eldiń esigin qaqpastan tórine ozyp aldy.
Ekinshi tolqyn qaýpinen halqyn saqtaýdyń joly dep Izraıl álemde birinshi bolyp el kóleminde tolyqqandy karantın engizip tastady. Shekteýge qarsylardyń kóptigine qaramastan, Izraıl úkimeti karantın qajet dep eseptep, ekinshi tolqynmen kúreske barynsha kirisken.
