Memleket basshysynyń tapsyrmasyn oryndaý boıynsha Is-sharalar jospary aıasynda 2013 jyldyń sońyna deıin 46 is-shara júzege asyrylady, dep málimdedi Ekonomıka jáne bıýdjettik josparlaý mınıstri Erbolat Dosaev Úkimet otyrysynda. Bul týraly Úkimettiń baspasóz qyzmeti habarlady.
«2013 jyldyń aıaǵyna deıin 46 is-sharany, al 2014 jyly 22 is-sharany iske asyrý kózdelgen. Bul rette, 2 is-shara bıýdjettik zańnamany jetildirý máseleleri jónindegi Zańdy qabyldaǵannan keıin eki aı merziminde iske asyrylatyn bolady», - dedi E. Dosaev.
Sonymen, vedomstvo aǵymdaǵy jyldyń sońyna deıin Úkimetke memlekettik jáne salalyq baǵdarlamalardy qarjylandyrýdyń basymdyǵy jáne olardy ońtaılandyrý jóninde; ekonomıka jáne bıýdjettik josparlaý mınıstrligi men óńirlik damý mınıstrligi arasyndaǵy ókilettikterdiń arajigin naqty ajyratý boıynsha; jergilikti atqarýshy organdar qyzmetin baǵalaýdyń eseptiligin jáne kórsetkishteri sanyn ońtaılandyrý jóninde; memlekettik bıýdjet esebinen qarjylandyrylatyn jobalardyń jobalyq-smetalyq qujattamasyn ázirleý, saraptaý jáne bekitý tártibin, ony júzege asyrýdy baqylaýdy jetildirý jáne basqa da is-sharalar jóninde usynystardy engizýdi josparlap otyr.
Onyń aıtýynsha, is-sharalar jospary 70 is-sharadan turady, solardyń aıasynda tórt normatıvtik-quqyqtyq akti jobasyn ázirleý kózdelgen. Olardyń ishinde «Memlekettik organdarda satyp alýlardy ótkizý boıynsha konkýrstyq komıssııalardy tóraǵalary etip tıisti birinshi basshylardy taǵaıyndaýdy qamtamasyz etý týraly», «Qoldanystaǵy zańnamaǵa memlekettik satyp alýlar qorytyndylaryna shaǵymdaný rásimin jetildirý bóliginde ózgerister engizý týraly» jáne basqa da qujattar bar.
Mınıstr aıtyp ótkendeı, jospardyń kóptegen is-sharalary Ekonomıka jáne bıýdjettik josparlaý mınıstrligine, О́ńirlik damý mınıstrligine, Qarjy mınıstrligine, Indýstrııa jáne jańa tehnologııalar mınıstrligine bekitilgen.
Sáken Maılybaı.
