Jalpy, bul tutynýshylardyń mádenıetin jáne tutynatyn taýarlar men qyzmetterdiń sapasyn jaqsartýǵa múmkindik beredi. Budan basqa, Zańda tutynýshylardyń quqyqtaryn qorǵaý jónindegi Vedomstvoaralyq keńes qurý kózdelgen. Onyń otyrystarynda memlekettik organdardyń jumys nátıjeleri talqylanyp, kemshilikter anyqtalyp, tıisti sheshimder qabyldanady. Osy Keńestiń quramy men erejesi Úkimettiń qaraýynda.
Sondaı-aq mınıstrlik tutynýshylardyń quqyqtaryn qorǵaý salasyndaǵy atqarylǵan jumystar týraly saraptamalyq baıandamany jyl saıyn Úkimetke usynatyn bolady. Qurylyp jatqan Biryńǵaı aqparattyq júıe arqyly jınalatyn málimetter atalǵan problemalardy jedel jáne sapaly túrde sheshetin jumystyń negizin quraıtyn bolady. Bul júıe tutynýshylardy, bıznesti, memlekettik organdardy birtutas ekojúıege baılanystyrady jáne salalar bólinisinde, daýdyń máni men qaraý sýbektileri boıynsha shaǵymdardy qurylymdastyryp, qadaǵalaýǵa múmkindik beredi.
Mamandandyrylǵan úkimettik emes uıymdar da júıeniń tolyqqandy qatysýshylary men benefısıarlaryna aınalady. Aqparattyq júıeni qanatqaqty testileý Nur-Sultan qalasynda kásipkerlik sýbektileriniń erikti túrde qatysýymen aǵymdaǵy jyldyń qazan aıyna josparlanǵan.
"Biz Qazaqstandaǵy tutynýshylardyń quqyqtaryn qorǵaý júıesin túbegeıli jańa deńgeıge kóteretin birqatar jańa bastamalardy usynamyz. Birinshiden, tutynýshylardyń barlyq qoǵamdyq uıymdaryn biriktiretin, óńirlerde keń taralǵan ókildikteri bar Ulttyq tutynýshylar qaýymdastyǵyn qurý múmkindigin qarastyrý", dedi Saýda jáne ıntegrasııa mınıstri.
Ekinshiden, úkimettik emes uıymdardyń negizinde ombýdsmen ınstıtýtyn qurý.
Úshinshiden, normatıvtik-quqyqtyq aktilerdi ázirleý kezinde tutynýshylardyń múddelerine qatysty retteýshilik áserdi taldaý jáne ýákiletti organmen kelisý mindettiligin engizý.
Tórtinshiden, tutynýshylar quqyqtaryn qorǵaý salasyndaǵy qoǵamdyq birlestikterdi mınıstrlikter men ákimdikter janyndaǵy konsýltatıvtik-keńesshi organdardyń quramyna qosý.
Besinshiden, memlekettik jáne jergilikti atqarýshy organdardyń, sondaı-aq kvazımemlekettik uıymdardyń qyzmetterin baǵalaý kórsetkishterine (KPI) tutynýshylar tarapynan qanaǵattaný men olardyń jumystaryna senim deńgeıin engizý.
Altynshydan, tutynýshylardyń múddeleri men quqyqtaryn tolyǵymen eskere otyryp, memlekettik jáne jeke uıymdar úshin Erikti iskerlik erejeler men úlgilik kelisimsharttarǵa normalardy qabyldaý.
Jetinshiden, tutynýshylar men kásipkerler úshin tutynýshylar quqyǵyn qorǵaý quraldary týraly tegin onlaın dárister kýrstaryn ótkizý.
О́z kezeginde Joǵarǵy Sot janyndaǵy Sottardyń qyzmetin qamtamasyz etý departamenti basshysynyń orynbasary Aslan Túkıev Joǵarǵy sottyń sońǵy zańnamalyq ózgeristerdi ázirleýge qatysqanyn habarlady.
"Biz tutynýshyǵa sotqa júginbeı-aq keltirilgen moraldyq zııannyń ótemaqysyn tóleý múmkindigin oń baǵalaımyz, jalpy alǵanda, sot júıesi tutynýshylyq daýdy retteýdiń jańa tártibine sáıkes jumys isteýge daıyn", dedi A. Túkıev.
Aǵymdaǵy jyldyń segiz aıynyń ishinde sottarǵa tutynýshylardyń quqyqtaryn qorǵaý týraly 677 talaparyz kelip tústi. Onyń 385-i qaralyp, 306-sy talapkerdiń paıdasyna qanaǵattandyryldy. Onyń ishinde 94 ótinish boıynsha bitimgershilik kelisimder jasaldy.
"Bul jaqsy kórsetkishter, biraq olqylyqtar da boldy. Pozısııamyzdy úılestirý úshin biz osy aptada Joǵarǵy sot basshylyǵynyń, mınıstrliktiń jáne múddeli taraptardyń qatysýymen kezdesýdi josparladyq. Budan basqa, Joǵarǵy sot júıeli buzýshylyqtar boıynsha tutynýshynyń belgisiz sheńberiniń quqyqtaryn qorǵaý praktıkasyn qoldaıdy. Joǵarǵy sotta ujymdyq sot isi dep atalatyn tájirıbe jetkilikti zańnamalyq retteý bolmasa da, damytylyp, oǵan qoldaý jasalatyn bolady", dedi A.Túkıev.
