Shahmattan álemniń eks-chempıony Garrı Kasparov azamattyq alý ótinishimen Latvııa seımine, ıaǵnı parlamentine ótinish jasady. Bul týraly «Rosbalt» agenttigi habarlady.
Aqparat quralynyń málimdeýinshe, Kasparov sonymen qatar Reseı azamattyǵyn da saqtap qalǵysy keletinin aıtty. Muny ol Latvııa seıminiń erekshe eńbek sińirgen kisilerge mundaı artyqshylyq berýge quqyǵy bar ekenine arqa súıeı otyryp ótingen sııaqty.
Bıylǵy jylǵy maýsym aıynda Garrı Kasparov Jenevada Reseı bıligi tarapynan bolatyn qýǵynnan qorqyp, elge oralýdan bas tartyp otyrǵandyǵyn málimdegen edi.
«Saıası belsendilerdiń qyzmetterine tekserýdiń jalǵasýy maǵan da tıetindigi túsinikti. Meniń Máskeýge oralǵannan keıin qaıta keri shyǵa alatyndyǵyma senimim az. Sondyqtan da biraz ýaqyt Reseıge oralýdan bas tarta turamyn», - degen-di ol.
Sáken Maılybaı.
