Búgingi tańda adamdar ózin alańdatqan kez kelgen saýaldyń jaýabyn ınternetten izdeýdi ádetke aınaldyrǵany belgili. Infeksııanyń oshaǵyn aldyn ala anyqtaýǵa da sol ádeti kómektesedi. Aıtalyq, Google-diń izdeý júıesinde eń kóp suraý salynǵan sózderdi zertteı kele ǵalymdar «dám sezý qabiletiniń tómendeýi», «tábettiń azaıýy», «ish aýyrý» degen syndy tirkesterdiń koronavırýspen baılanysty ekendigin anyqtaǵan.
AQSh-tyń Nıý-Iork, Nıý-Djersı, Kalıfornııa, Massachýsets jáne Illınoıs shtattarynda Covid-19 vırýsy qatty taralǵany belgili. Osy 5 shatta pandemııa etek alardan 2-3 apta buryn joǵaryda atalǵan tirkesterdi ınternetten izdeýshilerdiń qatary kóp bolypty.
– Biz jınaǵan jáne saralaǵan derekterge súıensek, adamdardyń óz aǵzasyna qatysty saýaldary Covid-19 vırýsynyń taralý qaýpinen habar beredi. Iаǵnı Google trends pandemııaǵa qatysty boljam jasaıtyn baǵaly quraldyń rólin atqara alady, – delingen saıtta.
Jalpy, Google pandemııaǵa qarsy álemdik kúreske mańyzdy úles qosyp jatqanyn aıta ketý kerek. Aıtalyq, ol Apple-men birlesip koronavırýs juqtyrǵan adamdardy tez tabýǵa, olardyń kimmen baılanysqa túskenin anyqtaýǵa kómektesetin tehnologııa jasap shyǵardy.
Koronavırýs týraly jalǵan aqparat taratýshylardyń jolyn kesýge de Google korporasııasy belsene atsalysty. Indetti emdeýge kómektesedi degen jalǵan preparattardyń jarnamasyna da tyıym saldy.
