Úkimettik, akademııalyq jáne dıplomatııalyq toptar aldynda sóılegen sózinde Qazaqstannyń Elshisi Aqylbek Kamaldınov Memleket basshysynyń azamattyq qoǵammen tyǵyz ári syndarly ózara is-qımylda demokratııalyq ózgeristerdi jalǵastyrýǵa beıildiligin atap ótti. Ol konferensııaǵa qatysýshylardy Memleket basshysynyń Qazaqstan halqyna jyl saıynǵy Joldaýynyń negizgi basymdyqtarymen tanystyryp, atalǵan baǵdarlamalyq qujat 2019 jylǵy maýsymda Prezıdent Q.Toqaevtyń osy laýazymǵa saılanǵannan beri bastalǵan reformalardyń logıkalyq jalǵasy bolyp tabylatynyn aıtty.
Elshiniń pikirinshe, QR Prezıdenti jyl saıynǵy Joldaýynda belgilengen basymdyqtar aıasynda Qazaqstan men Kanada arasynda saıası, saýda-ekonomıkalyq jáne gýmanıtarlyq salalardaǵy yntymaqtastyqty arttyrý úshin jańa múmkindikter ashylýda. "Bıylǵy jyly Mıýnhende Prezıdent Q.Toqaev Premer-Mınıstr Dj.Trıýdomen birinshi ret kezdesti, bıznes-toptardyń qatysýymen birqatar is-sharalar josparlanýda, ekijaqty saýda damyp kelýde. Biz Kanada tarapymen tyǵyz qarym-qatynasymyzdy jalǵastyrýǵa úmittenemiz", dedi elshi.
Is-sharada Kanadanyń Qazaqstandaǵy, Qyrǵyzstandaǵy jáne Tájikstandaǵy burynǵy elshisi M.Skok, Kanadanyń Eýrazııa jáne Reseıdegi iskerlik qaýymdastyǵynyń (CERBA) tóraǵasy J.Breton, Karlton ýnıversıtetiniń memlekettik saıasat fakýlteti dekanynyń orynbasary D.Mendeloff sóz sóıledi. Baıandaýshylardyń pikirinshe, bizdiń elimiz qysqa merzim ishinde ekonomıka men áleýmettik salada aıtarlyqtaı serpilis jasaı aldy. Konferensııa qatysýshylary Qazaqstan sheteldik ınvestısııalardy tartýda óńirdiń basqa elderi úshin úlgi bolyp tabylatynyn aıtty, sondaı-aq saıası jáne ekonomıkalyq ózgerister jalǵasatynyna senim bildirdi.
Konferensııa kópshiliktiń nazaryn aýdardy. Is-sharaǵa Ortalyq Azııany zertteýmen aınalysatyn Kanada men Qazaqstannyń jeti jetekshi ýnıversıtetteriniń ǵalymdary men zertteýshileri, kanadalyq joǵary oqý oryndarynyń stýdentteri men jýrnalıster de belsendi qatysty.
Konferensııa qorytyndysy boıynsha qatysýshylar Qazaqstan halqynyń Prezıdent Q.Toqaevtyń reformalaryna degen joǵary senimin atap ótti. Is-shara kanadalyq ǵylymı, úkimettik jáne bıznes toptardyń eki el arasyndaǵy ózara tıimdi seriktestikti arttyrýǵa qyzyǵýshylyqtary bar ekenin kórsetti.
