Elorda • 24 Qyrkúıek, 2020

Elordada qoǵamdyq kólikter sıfrlandyrylady

Jyl aıaǵyna deıin qaladaǵy kóshe qıylystarynyń 80% osy sıfrly júıemen qamtylatyn bolady. Atalǵan shara táýliktiń qarbalas ýaqytynda túıindi baǵyttardyń júktemesin azaıtady. Bul týraly Nur-Sultan qalasynyń ákimi Altaı Kólginov óziniń "Instagram" paraqshasynda jazdy, dep habarlaıdy Egemen.kz

Aıym DÁÝIT

"Búgin Kazan Digital Week halyqaralyq forýmyna onlaın qatystym. Basqa elderdegi áriptestermen birge ıntellektýal transport júıelerin talqylap, tájirıbemizben bólistik. Qoǵamdyq tasymaldyń modernızasııasy men sıfrlanýy − basym baǵyttardyń biri. Avtobýstardy jańartyp qana qoımaı, jańa marshrýttar qosyp, jol salyp, qalalyqtardyń yńǵaıy úshin elektrondy qarym-qatynas mehanızmderin engizý kerek", deıdi elorda ákimi.

Birinshi. Intellektýal transport júıesin damytý

Kóshe qıylystarynda turǵan baǵdarshamdardyń 50% adaptıv basqarý júıesimen qamtylǵan. Mundaı tehnologııa kólik aǵynyn avtomatty rejimde eseptep, baǵyttar boıynsha sheshim qabyldaıdy. Bul kólik aǵynynyń jyldamdyǵyn arttyryp, jolda joǵalatyn ortasha ýaqytty 20% qysqartýǵa múmkindik berdi. Jyl aıaǵyna deıin qaladaǵy kóshe qıylystarynyń 80% osy sıfrly júıemen qamtylady. Bul – táýliktiń qarbalas ýaqytynda túıindi baǵyttarǵa júktemeni azaıtady.

Ekinshi. Qaýipsizdikti qamtamasyz etý

Baqylaý kameralary jol-kólik oqıǵalaryn 20% qysqartyp, ólimge ákep soǵatyn jaǵdaılardy 40% azaıtýǵa múmkindik berdi.

Úshinshi. Qoǵamdyq tasymaldy damytý

Qalalyqtardyń yńǵaıy úshin qalamańy kólik qatynasy engizildi (32 eldi mekenge qyzmet kórsetiledi); ekspress, sport shuttle bus marshrýttar da bar (buqaralyq mádenı sharalar úshin). Turǵyndardyń ótinishi boıynsha 40 marshrýt ońtaılandyrylǵan.

Qoǵamdyq kólikterdi 70%-dan astamyn jańartyp, jyl basynda kóshelerge 100 jańa elektr avtobýstar shyqty. Jyl aıaǵyna deıin elektr avtobýstardyń taǵy bir partııasy shyǵady.

Barlyq avtobýs jolaqy tóleýdiń elektrondy júıesimen jabdyqtalǵan, bul karantın kezeńinde indet juqtyrý yqtımaldyǵyn azaıtty. Elektrondy esep aıyrysýǵa 100% ótýdiń arqasynda 6 mlrd teńge "kóleńkeli aınalymnan" shyǵaryldy.

Sonymen birge qalalyqtar avtobýstardyń qaı jerde kele jatqanyn mobıl qosymsha arqyly qarap, aıaldamalardaǵy elektrondy tablolardan kóre alady.

"Avtobýs jolaqtary da nátıjeli boldy: avtobýstardyń joldaǵy ortasha ýaqyty 15-20% qysqardy. Jolaqtardyń sanyn 24-ten 36-ǵa kóbeıtpekpiz. Bul avtobýsty kútý ýaqytyn jáne 15% azaıtady. Barlyq baǵyttar boıynsha jumystar turaqty júrgizilip keledi", dep jazdy Altaı Kólginov.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz