Elorda • 25 Qyrkúıek, 2020

"Nur-Sultan 1" temirjolyndaǵy turaq platformasy jańartyldy

28 qyrkúıekten bastap "Nur-Sultan 1" temir jol alańyndaǵy (eski vokzal) turaqta jańartylǵan platforma iske qosylady, dep habarlaıdy Egemen.kz

Aıym DÁÝIT

Jańartylǵan turaq platformasy paıdalanýshylardy turaq aýmaǵyna kirý, aqy tóleý jáne odan shyǵý sııaqty qajetti qyzmetter keshenimen qamtamasyz etedi.

Turaq úshin tólemdi endi parkomattan bólek, basqa da tásildermen jasaýǵa bolady. Ol: mobıldik qosymsha, saıt, kassa, Qiwi jáne Kaspi.kz. Arnaıy nsparking.kz mobıldi qosymshasy daıyndalyp, iske qosyldy (App Store jáne Google play), nsparking.kz resmı saıty jasaldy.

nsparking.kz saıtyndaǵy jeke kabınet jáne nsparking.kz mobıldi qosymsha arqyly paıdalanýshy kólik quralynyń memlekettik nómiri boıynsha nemese turaq kartasynyń nómiri boıynsha ózi úshin de jáne basqa paıdalanýshy úshin de tólem jasaı alady, jeke shotyn tolyqtyrady, turaq qyzmeti men qoldanystaǵy tarıfter týraly aqparat alady, sondaı-aq tólemder men turaq sessııalarynyń tarıhyn qadaǵalaıdy.

Sondaı-aq turaq baǵdarlamasy Qiwi jáne Kaspi.kz tólem júıelerimen biriktirilgen. Temirjol vokzaly ǵımaratynda QIWI termınaldary arqyly tóleýge bolady, onda basty ekranǵa nsparking.kz ornalastyrylǵan. Tólem jasaý úshin paıdalanýshyǵa kólik quralynyń memlekettik nómirin nemese turaq kartasynyń nómirin engizý qajet. Derbes shotty nsparking.kz qosymsha arqyly tolyqtyrýǵa bolady.

Temir jol ǵımaratynda aqy tóleý parkomaty qoıyldy. Tólemdi qolma-qol aqshamen de, aqshasyz tásilmen de júrgizýge bolady. Sondaı-aq banktik kartamen baılanyssyz jáne baılanys tásilderimen tóleýge bolady. Uıaly telefon men bank kartasy arqyly tólemdi NFC arqyly jasaýǵa múmkindik bar. Turaq keńistigin paıdalaný baǵasy ózgergen joq.

Mobıldik qosymshalarda, saıtta jáne Qiwi termınaldarynda tólem jasaý múmkindigi joq paıdalanýshylar úshin operatordyń táýlik boıy tólem qabyldaý orny qarastyrylǵan.

Suraqtar týyndaǵan jaǵdaıda 24/7 rejiminde operatormen baılanysýǵa bolady. Ol úshin kirý jáne shyǵý baǵandarynda IP-baılanys qurylǵylary ornatylǵan.

Turaq platformasyn jańalaý barysynda Nur-Sultan qalasynyń aýa raıy eskerildi. Turaq jabdyqtary -50 S°deıingi temperatýrada jumys isteı alady.

Turaq platformasynyń mańyzdy jańalyqtarynyń biri – kólik quraldarynyń memlekettik tirkeý nómirlerin taný. Turaq paıdalanýshylary kirý kartalaryn bir-birimen almastyra almaıdy nemese turaq ýaqytyn tólemeı kete almaıdy.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz