Úkimet Memleket basshysynyń syn-eskertpelerinen keıin bir aı ótse de júıeli usynys jasamaı otyr. Bul týraly Ortalyq kommýnıkasııalar qyzmetinde ótken baspasóz máslıhatynda Parlament Májilisi ekonomıkalyq reforma jáne óńirlik damý komıtetiniń múshesi, depýtat Azat Perýashev málimdedi.
«Keden odaǵy elderimen saýdaǵa qatysty, Prezıdent «pragmatıkalyq ekonomıkalyq esep, sonymen qatar qaı tusta jeńilip, qaı tusta asyp túsetinimizge taldaý jasaýdy jáne ne isteý kerektigi» jóninde tapsyrma bergen edi. Biraq ázirge Úkimet tarapynan mundaı esep jasalǵan joq», - dedi Perýashev.
Onyń aıtýynsha, «Aq jol» sarapshylary bıylǵy jyldyń shilde aıynda 2011-2012 jyldarǵa taldaý jasaǵan. Ol Qazaqstanda jyldan-jylǵa Keden Odaǵy elderimen saýda boıynsha keri saldo oryn alyp otyrǵanyn kórsetip otyr.
«2011 jyly ol 8 mlrd dollardan asty, 2012 jyly 10,9 mlrd dollardy qurady. Osy rette qazaqstandyq eksport tómendep, ımporttyń ósýi jalǵasýda», - dedi ol.
Depýtattyń aıtýynsha, «Qazaqstan-2050» strategııasynyń jarııalanǵanyna bir jyl, al Prezıdenttiń jappaı jekeshelendirý jáne kvazımemlekettik sektorda memlekettik-jeke menshik seriktestikti damytý boıynsha úkimetke taqqan syn-eskertpelerinen keıin bir aı ótti. Alaıda, áli de aıtarlyqtaı nátıje men júıeli usynystar joq.
Sáken Maılybaı.
