Memleket basshysy óziniń "Jańa jaǵdaıdaǵy Qazaqstan: is-qımyl kezeńi" atty Joldaýynda halyqpen tıimdi keri baılanys ornatý úshin memlekettik organdardyń ashyqtyǵy men qoǵamǵa esep berýin qamtamasyz etý qajettigine nazar aýdardy.
Bul tásil "Halyq únine qulaq asatyn memleket" tujyrymdamasynyń iske asyrylýy men memlekettik apparattyń azamattardyń suranystaryna den qoıýyn arttyrý jónindegi odan ári jasaıtyn qadamy.
Osyǵan oraı Prezıdent Kómekshisi – Qaýipsizdik Keńesiniń Hatshysy Á.Isekeshev Sybaılas jemqorlyqqa qarsy is-qımyl agenttigi jumysynyń servıstik úlgisimen tanysyp, onyń arnaıy monıtorıngtik toby, aqparattyq – aǵartý shtaby, ardagerler keńesi men "Astana-Adaldyq alańy", "Protecting Business and Investments", "Ashyq bıýdjet" jobalarynyń jetekshilerimen jáne qoǵam ókilderimen kezdesti.
Qoǵam ókilderi qoldanystaǵy jemqorlyqqa qarsy jobalardy jetildirý, azamattyq qoǵamdy, sondaı-aq belsendi jastardy tartý josparlary týraly baıandady.
Azamattyq qoǵam ókilderimen kezdesý barysynda Agenttik tóraǵasy A.Shpekbaev el basshylyǵynyń saıası erik-jigeriniń arqasynda qazirgi tańda jemqorlyqqa qarsy ozyq halyqaralyq standarttardy jedel engizý jalǵasyp jatqanyn atap ótti. Bul rette olardyń edáýir bóligi memlekettik baqylaýdyń balamasy retindegi qoǵamdyq baqylaýdy damytýǵa baǵyttalǵan.
Qaýipsizdik Keńesiniń Hatshysy memlekettik organdardyń halyqqa qyzmet kórsetýdiń servıstik úlgisine kóshýi bilim berý, densaýlyq saqtaý, halyqty áleýmettik qamtamasyz etý, jer qatynastary jáne t.b saladardaǵy turmystyq jemqorlyqty joıýdaǵy tabystyń negizgi faktorlarynyń biri ekendigin atap ótti.
Bul rette, Agenttik osy bastamany ilgerilete otyryp, ózi arqyly ashyqtyq, aıqyndylyq jáne tutynýshyǵa baǵdarlaný qaǵıdattaryna beıildilikti kórsetedi.
Á.Isekeshev Sybaılas jemqorlyqqa qarsy vedomstvonyń elordalyq departamenti qyzmetkerleriniń open-space kabınetterine baryp, mundaı tásildiń transparenttilik pen senim qalyptastyrýdyń qolaıly jaǵdaıyn jasaýdaǵy mańyzdylyǵyna toqtalyp ótti.
Jalpy, "Antıkor Ortalyǵy" servıstik ortalyǵy Agenttiktiń qoǵamdyq uıymdarmen ózara árekettestigi men halyqpen keri baılanysty qamtamasyz etýdiń tıimdi alańy.
Qaýipsizdik Keńesiniń Hatshysyna azamattardy qabyldaýdyń zamanaýı tetigi, sondaı-aq Agenttiktiń jemqorlyqqa qarsy jobalary jetekshileriniń bastamalary tanystyryldy.
"Astana-Adaldyq alańy" jobalyq keńsesiniń jetekshisi Mıras Shekenov Agenttiktiń elorda ákimdigimen tıimdi ózara árekettestigi týraly aıta kele, turmystyq jemqorlyqty joıý jáne azamattarǵa qolaıly jaǵdaı jasaý boıynsha jemqorlyqqa qarsy is-sharalardyń iske asyrylý barysyn baıandady.
Jemqorlyq táýekelderin azaıtý máselelerinde sıfrlandyrý erekshe oryn alady. Memlekettik mekemelerdiń bıýdjet qarajatynyń jumsalýyn onlaın rejimde qoǵamdyq baqylaý múmkindigin qamtamasyz etetin "Ashyq bıýdjetterdiń ınteraktıvti kartasy" jáne azamattardyń qarjylyq saýattylyǵyn arttyrýǵa baǵyttalǵan "Ashyq bıýdjet" jobasy erekshe qyzyǵýshylyq týdyrdy.
Á.Isekeshev kezdesýdiń qorytyndysy boıynsha qoǵam ókilderiniń bastamalaryn qoldap, memlekettik organdardyń ashyqtyǵy men aıqyndyǵyn jáne olardyń qoǵammen syndarly yntymaqtasý qajettigin atap ótti. Onda ár ótinish bıýrokratııalyq kidiristersiz jáne azamattardy joǵary turǵan memlekettik organdarǵa júginýge májbúrlemeı barynsha sapaly qaralýy tıis.
