Prezıdent Qasym-Jomart Toqaev Kýveıt memleketiniń Ámiri sheıh Sabah ál-Ahmad ál-Djaber As-Sabahtyń ómirden ozǵany týraly sýyt habardy tereń kúızelispen qabyldady.
«Sheıh Sabah parasatty da kóregen saıasatker, beıbitsúıgish bitimger retinde álemge tanymal bolyp, onyń aımaqtyq qaýipsizdik pen turaqtylyqty qamtamasyz etýge jumsaǵan kúsh-jigeri halyqaralyq qaýymdastyq tarapynan joǵary baǵasyn alǵany keńinen málim. Baýyryńyzdy Birikken Ulttar Uıymy «Gýmanıtarlyq kósem» dep tanýy da osynyń aıqyn dáleli ekeni sózsiz. Qazaqstandyqtardyń jadynda sheıh Sabahtyń esimi Qazaqstan men Kýveıttiń berik dostyǵy men san qyrly yntymaqtastyǵyn damytýǵa súbeli úles qosqan qaıratker, Otanyn sheksiz súıgen azamat retinde máńgi saqtalady. Qaraly sátte Sizge jáne áýletińizge, sondaı-aq barsha otandastaryńyzǵa Qazaqstan halqynyń jáne jeke ózimniń atymnan qaıǵylaryńyzǵa ortaqtasyp, kóńil aıtamyn», – delingen jedelhatta.
