Bul atalǵan aımaq úshin 1994 jyldan beri oryn alyp otyrǵan eń úlken qaqtyǵys. Bul shıelenis eki memleketpen shektelip qalmaı, odaqtastary Túrkııa men Reseıdiń de aralasýyna ákeldi. Túrkııa Syrtqy ister mınıstri Mevlýt Chavýshoǵly «Ázerbaıjan máselege sheshim tabýdy qajet dep tapsa, biz tıisti sharalardy qolǵa alamyz» degen málimdeme jasady. Mınıstrdiń aıtýynsha, ázirge Ázerbaıjannyń jaǵdaıdy sheshýge óz áleýeti de jetedi.
Odan keıin Fransııa úkimetiniń Armenııany qoldaıtyny belgili boldy. Fransııa prezıdenti Emmanýel Makron Túrkııanyń demeýi Ázerbaıjannyń Taýly Qarabaq aımaǵyn óz ıeligine alýǵa jigerlendirip otyrǵanyn aıtady. Onyń oıynsha, eki eldiń máselesine bulaı aralasý jónsiz. «Men bul jerde Túrkııanyń qaýipti ári oıǵa qonymsyz saıasatyn kórip turmyn», dedi E.Makron.
Buǵan deıin Armenııa premer-mınıstri Nıkol Pashınıan Reseı prezıdenti Vladımır Pýtınmen telefonmen sóıleskende, burynǵy Keńes qorǵanysynan kómek suraýdy josparlamaıtynyn jetkizgen edi. Alaıda úkimet basshysy munyń múmkin ekenin de jasyrmady.
Ázerbaıjan Qorǵanys mınıstrligi qaqtyǵysta qarsy jaqtyń 130 tankisi, 200 artıllerııalyq júıesi, 25 áýe qorǵanys júıesi, 50 tankige qarsy qarýy joıylǵanyn habarlady.
Armenııa tarapy ázirge Armenııa, Ázerbaıjan, Reseıdiń birikken sammıtin kútýdiń orynsyz ekenin málimdedi. «Kelisim úshin qolaıly kezeńdi kútý kerek. Ázirge mynadaı joıqyn qarýly qaqtyǵys kezinde mámilege kelýdiń basqa jolyn izdeý kerek», dedi Pashınıan.
