Kollajdy jasaǵan Amangeldi Qııas, «EQ»
Prezıdenttiń bul máselege nazar aýdarýy beker emes. Keıingi kezde qos eldiń azamattyǵyn alǵandar týraly aqparat ta, jaýapqa tartylǵan adamdar da kóbeıip barady. Ishki ister mınıstrligi Kóshi-qon qyzmeti basqa memlekettik organdarmen birlesip, Qazaqstanda jyl basynan beri pysyqtalǵan algorıtm boıynsha qos azamattyǵy úshin jaýaptylyqqa tartylǵan 284 burynǵy azamaty anyqtaldy.
Azamattyǵynan aıyrylǵan adamdar bola tura, tártip buzýshylar Qazaqstanǵa kelý jáne turý úshin qazaqstandyq qujattardy paıdalandy. Olardyń birqatary shet memlekettiń azamattyǵyn qabyldaǵany týraly ýaqtyly habarlamaǵany úshin ákimshilik jaýapkershilikke tartyldy. Osy zań buzýshylyqtar úshin 266 adamǵa (277 800 teńgeden 555 myń teńgege deıin) aıyppul salynyp, 18 adam elden shyǵaryldy. Bul – Ishki ister organdarynyń anyqtaǵany ǵana. Al eshkimniń kózine túspeı, «kók pasportty» emin-erkin paıdalanyp júrgenderdiń naqty sany belgisiz.
Qos azamattyqqa Ata zańymyzda da, «Azamattyq týraly» zańda da tyıym salynǵan. Zań boıynsha, ózge eldiń azamattyǵyn qabyldaǵan Qazaqstan azamaty otyz táýlik ishinde Ishki ister organdaryna nemese Qazaqstan Respýblıkasynyń sheteldegi mekemelerine osy qadamy týraly habarlap, qolyndaǵy Qazaqstan Respýblıkasynyń pasportyn nemese jeke kýáligin tapsyrýy tıis.
Atalǵan zań talaptaryn oryndaýǵa asyqpaıtyndar da bar. Olar bir jaǵynan Qazaqstannyń azamattaryna arnalǵan ıgilikti kórip otyrsa, ekinshi jaǵynan sheteldiń jaqsylyǵyn paıdalanýǵa tyrysady. «Egemen Qazaqstan» gazetiniń tilshileri daıyndaǵan maqalalar osyny dáleldeıdi. Endeshe, bul máselege quqyq qorǵaý organdary erekshe nazar aýdaryp, uqyptylyq tanytýy qajet ekeni aıtpasa da túsinikti.
