Praımerız qatysýshylaryna daýys berý aıaqtaldy

Keshe elorda ýaqyty boıynsha saǵat 14.00-de partııanyń ár óńirde ótkizetin ishki saılaýy aıaqtalyp, úmitkerlerge daýys berý toqtatyldy.

Bul irikteý eń aldymen Májilis pen barlyq deńgeıdegi máslıhattar saılaýyna partııalyq tizimderge engizý úshin qoǵamnyń senimi men qoldaýyna ıe bolǵan bedeldi kóshbasshylardy anyqtaý maqsatynda uıymdastyrylǵan bolatyn.

Elbasy praımerızdiń bastalýyna baılanysty úndeýinde «Barlyq partııa­lastardy, Nur Otan jaqtastaryn elimiz úshin osynaý mańyzdy saıası oqıǵaǵa barynsha belsendi qatysýǵa shaqyramyn», degen edi. Partııa tóraǵasy ózgelerdi shaqyryp qana qoımaı, úlgi kórsetip, ózi de onlaın daýys bergenin aıta ketý qajet. Daýys berý kezinde Elbasy ishki partııalyq irikteýge qatysýshylardyń úgit-nasıhat jumystaryn jáne qo­ǵam­dyq pikirtalastardy muqııat baqy­laǵanyn da atap ótti.

Osyndaı úlgili isti partııa Tóraǵasynyń birinshi orynbasary Baýyrjan Baıbek te jasady. Ol saılaý ýchaskesine baryp, ózi de daýys berdi. Sonymen qatar daýys berý prosesiniń uıymdastyrylý deńgeıimen tanys­ty. Bul týraly ol áleýmettik jelidegi jeke paraqshasynda «Partııa Lıderi N.Nazarbaevtyń tapsyrmasymen Nur Otan-nyń partııaishilik saılaýy elimizdiń partııalyq-saıası damý tarıhynda tuńǵysh ret respýblıkalyq aýqymda ótýde. Bul – Elbasy bastamasymen qolǵa alynǵan partııany «qaıta jandandyrýdy» túıindeıtin kezeńniń biri. Búgingi tańda adamdar qoǵam ómirine belsendi atsalysqysy keledi. О́zgeristerge, jańa tulǵalar men tyń ıdeıalarǵa degen suranys arta túsýde. Elimizdiń jetekshi saıası kúshi retinde Nur Otan partııasy el suranysyn der kezinde qanaǵattandyryp otyr. Bas­tapqyda týyndaǵan kúmánǵa qaramastan, búginde praımerızdiń óz deńgeıinde ótip jatqanyn nyq senimmen aıtýǵa tolyq negiz bar. Jarııa túrdegi partııaishilik irikteý elimiz úshin sony saıası jańalyq retinde jurt qyzyǵýshylyǵyn týǵyzyp, 10 myńnan astam qatysýshy 60 myńnan astam kezdesý men pikirsaıys ótkizdi. Is-sharalar barysynda 1,4 mln adam qamtyldy», dep jazdy.

Onyń aıtýynsha, el Prezıdenti Q.Toqaevtyń «Halyq únine qulaq asatyn memleket» tujyrymdamasy aıasynda árbir óńir, qala men aýdan bo­ıynsha jarııalanǵan 216 saılaýaldy baǵdarlamanyń jobasyna qatysty 20 myń usynys jınalypty. Turǵyndardy tolǵandyratyn taqyryptardyń alǵashqy bestigine – turǵyn úıdiń qoljetimdiligi, joldardy jóndeý, áleýmettik qoldaý, densaýlyq saqtaý men bilim salalarynyń deńgeıin arttyrý máseleleri kirip otyr. Elbasy tapsyrǵandaı, barlyq kóterilgen máselelerdi partııa erekshe baqylaýǵa alady.

Al partııanyń hatshysy Álibek Áldeneı Facebook-tegi jeke paraqsha­synda «3 qazanda 08:00-den 14:00-ge deıin ınternetke qosylý múmkindigi joq 643 eldi mekende qaǵaz bıýlletender boıynsha daýys berý ótti. Bul eldi mekender respýblıkalyq deń­geıdegi qalalardy qospaǵanda elimiz­diń barlyq óńirlerindegi shalǵaı aýdandarda ornalasqan. Bul Nur Otan partııasynyń barlyq músheleriniń saılaý quqyǵyn iske asyrý úshin jasaldy» degen jazba qaldyrypty. Iаǵnı, shalǵaı eldi meken turǵyndarynyń tilek-nıeti de eskerýsiz qalǵan joq.

Kandıdattarǵa Nur Otan partııa­sy uıymynyń atynan nemese ózin ózi usyný jolymen de qatysýyna múm­kindik berildi. Osylaısha partııanyń qundylyqtaryn ustanatyn jáne saılaý quqyǵy bar kez kelgen azamat praımerızge úmitker bola aldy. Ol úshin kandıdat praımerızge qatysýshylardy tirkeý merzimi aıaqtalǵanǵa deıin bastaýysh partııanyń qataryna qosylýy kerek edi.

Aıta keteıik, elimizde kandıdattar­dy usyný men tirkeý jumystary 17 tamyzda bastalyp, 28 tamyzǵa (qosa eseptegende) deıin jalǵasqan bolatyn. Úmitkerlerge úgit-nasıhat jumys­taryna daıyndalý úshin 31 tamyzdan 6 qyrkúıekke deıin 7 kún ýaqyt berildi. Keıin, 7 qyrkúıekten 3 qazanǵa deıingi aralyqta úmitkerlerdiń úgit-nasıhat jumystary, sonyń ishinde 14-30 qyrkúıek aralyǵynda jarııa pikir­­saıystar uıymdastyryldy. Bul pikir­­saıystar «Praımerız» arnaıy aq­parattyq júıesi arqyly ótip, partııa­nyń resmı akkaýnttarynda jarııalanyp turdy.

Taǵy bir aıta keterligi, partııa Tór­aǵa­synyń tapsyrmasy boıynsha úmit­kerlerge onlaın-formatta daýys berý úshin arnaıy platforma da ázirlengen bolatyn. Osylaısha «Praımerız» júıe­­si turǵyndarmen keri baılanysty barynsha kúsheıtýdi, jalpy jurtshy­lyqtyń pikirlerin eskere otyryp, túrli bastamalar men zań jobalaryn onlaın-talqylaý múmkindigin kózdegen edi.

Sóıtip tamyzdyń bel ortasynda bastalǵan irikteý 1-4 qazan aralyǵynda mobıldi qosymsha jáne arnaıy veb-portal arqyly elektrondy daýys berýmen túıindeldi. Daýys berýdiń sońǵy kúni partııa uıymdarynyń bazasynda saılaý ýchaskeleri ashyldy. Internet jelisi joq eldi meken turǵyndary saılaý ýchaskelerine kelip, qaǵaz bıýlletender arqyly daýys berdi.

Buǵan deıin Nur Otan partııasy praımerız ótkizý, sondaı-aq kandıdattarǵa uıymdastyrýshylyq jáne quqyqtyq qoldaý kórsetý máse­le­leri boıynsha 8 (800) 080 4441 arnaıy jelini iske qosqan bolatyn. Sony­men qatar arnaıy primaries.kz veb portaly da qatysýshylar men daýys berýshilerdiń kádesine jarady. Osy­laısha https://vote.primaries.kz veb-saıty jáne mobıldi qosymsha arqyly onlaın daýys berý merzimi týra bir táýlik­ke, ıaǵnı 4 qazan kúngi saǵat 14:00-ge deıin uzartylǵan bolatyn.

Kandıdattarǵa daýys berý toqta­tylǵanymen, onyń qorytyndysy ázirge qolymyzǵa tıgen joq. Partııa ókilderi búginde barlyq daýysty sarapqa salyp, kimniń baǵy janǵanyn anyqtap jatyr.