"Biz úıde oqshaýlanyp otyrǵanda, dárigerler jumys ornynda qalyp, adamdardyń densaýlyǵy men ómiri úshin jan aıamaı kúresti. Sol sebepti de, biz, jańa maýsymnyń alǵashqy on konsertin medısına qyzmetkerlerine arnap, osylaısha alǵysymyz ben qurmetimizdi bildirgimiz keldi", dedi "Astana Balet" teatrynyń dırektory Aleksandr Sovostıanov.
Astanalyq teatr ártisteri eki bólimnen turatyn konserttik baǵdarlamasyn tartý etti: Rıkardo Amaranteniń "LoveFearLoss" bir aktili baleti men "Uly Dala murasy" dıvertısmenti. Osy horeografııalyq toptamaǵa Aıgúl Tátı, Anna Soı, Zaýyrbek Raıbaev, Dáýren Ábirov syndy keshegi jáne búgingi qazaqstandyq baletmeısterler qoıǵan 13 bı mınıatıýrasy engen.
Jeti júzden astam adamǵa arnalǵan kórermen zaly burynǵydaı emes, ózgesheleý kórindi: astanalyq sanıtarlyq dárigerdiń qaýlysyna sáıkes, spektakl aýdıtorııasy elý adamnan aspaýy tıis. Alaıda, osynshalyqty bos zaldyń ózinde, konsertten keıin ártisterge kórsetilgen qoshemet óte zor edi.
"Erekshe estetıkalyq lázzat aldym. Ártisterdiń plastıkasy qandaı, shirkin?! Zamanaýı órnekterge baı ulttyq naqyshtaǵy bı qandaı?! Bári óte ádemi, óte áserli boldy. Talantty ártisterińiz qýanyshty kóńil-kúıimen bólisti. Muny ár kórermen sezingenine shúbám joq", degen oıymen bólisti, qalalyq ftızıopýlmonologııa ortalyǵynyń dárigeri Gúlnar Amanjolova.
Teatr basshylyǵy on qaıyrymdylyq konsert ótkizýdi josparlap edi, sonyń altaýy Shymkent pen Nur-Sultan qalalarynda ótti. Qarasha aıynda teatr Qaraǵandy men Semeıde taǵy 4 qaıyrymdylyq konsert ótkizbekshi.
