Saılaýshylardyń basym bóligi, ıaǵnı 581 104 adam onlaın daýys berse, 81 583 azamat dástúrli ádisti paıdalanyp, saılaý ýchaskelerine keldi. «Qaǵaz bıýlletenderdiń barlyǵy partııanyń Ortalyq uıymdastyrý komıtetine jetkizilip, rastaldy. Máselen, Jambyl, Túrkistan jáne Qyzylorda oblystarynyń shalǵaı aýdandarynan jetkizilgen qaǵaz bıýlletenderdiń sońǵy legin tańerteń aldyq. Endi barlyq málimet «Praımerız» aqparattyq júıesine tolyq salynyp, barshaǵa qoljetimdi boldy (https://nurotan.kz jáne https://primaries.kz saıtynda)», dedi partııa hatshysy Arman Qyryqbaev.
Onyń aıtýynsha, praımerızde baq synaýǵa 10 990 adam bel baılapty. Olardyń 36,7%-y – áıelder, 29%-y – 35 jasqa deıingi jastar. Bastaýysh partııa uıymdarynan kandıdattardyń 30%-y usynylsa, 70%-y ózin-ózi usynǵandar. Úmitkerlerdiń ortasha jas mólsheri 43 jasty qurady. «Osy kórsetkishterdiń ózi-aq elimizde ǵana emes, búkil Ortalyq Azııada tuńǵysh ret uıymdastyrylǵan jańa saıası qural – praımerızge jurttyń erekshe qyzyǵýshylyq tanytqanyn jáne onyń óz deńgeıinde ótkenin aıqyn kórsetti. Elbasy, partııa Tóraǵasy Nursultan Nazarbaev saıası dodany ótkizer aldynda «Praımerızdiń mindeti – halyqtyq partııalyq tizimderdi qalyptastyrý» dep atap ótken bolatyn. Praımerız nátıjesi partııa Tóraǵasy qoıǵan tapsyrmanyń oryndalýyna qajetti alǵysharttyń naqty jasalǵanyn kórsetip otyr.
Bastapqyda týyndaǵan keıbir kúdik pen kúmánge qaramastan, praımerız óte qarqyndy da tartysty ótti. Ásirese dodaǵa qatysqandar arasynda jastar men áıelder qatary mol. Partııa praımerızdiń arqasynda óz qatarlastary arasynan eldiń qoldaýy men senimine ıe bolǵan úzdikterdi iriktedi», dep otyr A.Qyryqbaev.
Partııa hatshysynyń aıtýynsha, praımerız ótkizý barysynda partııanyń aýyzbirshiligi artyp, ortaq maqsat jolyndaǵy murattas jandardyń birtutas kúshine aınaldy. Iаǵnı praımerız partııalastardy bir-birimen tyǵyz baılanystyratyn, birligin bekemdeıtin dánekerlik qyzmet atqardy. Praımerız barysynda halyqtyń nazaryna usynylǵan 216 saılaýaldy baǵdarlamanyń jobasy oı eleginen ótkizilip, oǵan 20 myńnan astam usynys jınaldy. Tyńnan oı qosylyp, atalǵan jobalar halyqtyq sıpatqa ıe boldy.
«Biz elimizde ótken praımerızde onyń shetelderde qalyptasqan klassıkalyq úlgisine tán belgilerdiń barlyǵy da kórinis tapqanyna kýá boldyq. Qatysýshylar arasynda pikirsaıys ta, tartys ta, tipti keıde bir-birin aıyptaý da ushyrasty. Biraq bári de bekitilgen erejege saı, ádepten aspaı ótti. Bul jerde jeńgen men jeńilgen degen joq. Bári de utty. Praımerız eń aldymen elimiz úshin ıgi is boldy. Búkil praımerız ótkizý kezeńi boıy Partııalyq baqylaý komıteti tyńǵylyqty jumys jasap, tártip buzýshylyqtarǵa jedel nazar aýdaryp, tıisti sharalar qabyldady. Atap aıtqanda, 30-dan astam aryz ben ótinish qaraldy. Praımerız ótkizý erejesin buzǵany úshin partııanyń 20 múshesi jaýapkershilikke tartyldy, daýystardy burmalaý faktileri úshin 7 kandıdat, praımerız ótkizý erejesin saqtamaǵany úshin 27 úmitker tirkeýden shyǵaryldy», deıdi partııa hatshysy.
Onyń aıtýynsha, praımerız nátıjesinde Elbasy bastamasymen byltyr qolǵa alynǵan partııany «qaıta jandandyrý» baǵdarlamasy túıindeldi. Partııa túbegeıli jańǵyryp, qatary jańa tulǵalarmen tolyqty. Osylaısha, «Myqty lıderler – myqty partııa» qaǵıdaty júzege asty. «Nur Otan partııasy – memlekettiligimizdiń myzǵymaýyn, elimizdiń ósip-órkendeýin qamtamasyz etýge de birden-bir qaýqarly saıası kúsh. Muny praımerız nátıjeleri anyq kórsetti. Partııa elimizde jańa saıası mádenıetke negiz qalady. Osynaý aıtýly sharaǵa qatysqan barsha úmitkerdi shyn júrekten quttyqtaımyz!» dedi A.Qyryqbaev.
