Balabaqshanyń irgetasyna... 90 mıllıon!

Qurylys jumysyn qarqyndy júrgizý úshin, eń aldymen, árıne, aqsha kerek. Al memlekette aqsha joq emes, bar. Úkimet pen jergilikti bıýdjetten tek qurylys salasy­­­­­­nyń ózine jyl saıyn qyrýar qarjy bólinedi. «Almaq­­­­tyń da salmaǵy bar», osy qarjynyń arqa­synda kóptegen óńirlerde jańa mektepter, balabaqshalar, aýrýhanalar, sport saraılary paıdalanýǵa berilip jatyr.

Biraq kóńil ósirip, kóz qýantatyn mun­daı qýanyshty mysaldar, ókinishke qaraı, barlyq jerde birdeı emes. Jos­par­­lanǵan qurylys nysandaryn (aýrýhana, mektep, balabaqsha, sport kesheni jáne t.b.) «aqsha tabýdyń» op-ońaı jolyna aınaldyryp, mıllıondaǵan teńgeni qaltasyna basyp, «is bitti, qý ketti» dep ta­­ıyp turǵan «Dogdý Bıld» kompanııasy – sonyń biri.

*Úkimetke – synaq, ákimge – sabaq

Balabaqshanyń irgetasyna... 90 mıllıon!

Qurylys jumysyn qarqyndy júrgizý úshin, eń aldymen, árıne, aqsha kerek. Al memlekette aqsha joq emes, bar. Úkimet pen jergilikti bıýdjetten tek qurylys salasy­­­­­­nyń ózine jyl saıyn qyrýar qarjy bólinedi. «Almaq­­­­tyń da salmaǵy bar», osy qarjynyń arqa­synda kóptegen óńirlerde jańa mektepter, balabaqshalar, aýrýhanalar, sport saraılary paıdalanýǵa berilip jatyr.

Biraq kóńil ósirip, kóz qýantatyn mun­daı qýanyshty mysaldar, ókinishke qaraı, barlyq jerde birdeı emes. Jos­par­­lanǵan qurylys nysandaryn (aýrýhana, mektep, balabaqsha, sport kesheni jáne t.b.) «aqsha tabýdyń» op-ońaı jolyna aınaldyryp, mıllıondaǵan teńgeni qaltasyna basyp, «is bitti, qý ketti» dep ta­­ıyp turǵan «Dogdý Bıld» kompanııasy – sonyń biri.

Jýaly aýdanynyń ortalyǵy Baýyr­jan Momyshuly aýy­lyndaǵy 280 bal­dyrǵanǵa arnalǵan balabaqshanyń qu­rylys jumysy byltyr maýsym aıynda bastalǵan. Keste boıynsha ol bıylǵy qyr­kúıek aıynda paıdalanýǵa berilýge tıis edi. Biraq elimizdegi «Bala­pan» memlekettik baǵdarlamasy bo­ıynsha qolǵa alynǵan osy jaýapty jumystyń tizginin qolǵa alǵan «Dogdý Bıld» balabaqsha irgetasynyń ózin... bir jyl boıy qalapty. Jáne osy bolymsyz «jumystary» úshin qurylysqa qajetti barlyq 546 mıllıon teńgeniń alǵashqy transhy – 90 mıllıon teńgeni joq qylǵan.

– Men mundaı keleńsizdikti birinshi ret kórip turmyn. Olar á degennen-aq jumys ýaqytynyń kestesin buzdy. Sodan keıin qurylys múlde toqtap qaldy. Jergilikti jerden jaldanǵan jumysshylarǵa da jalaqy tólegen joq, – deıdi Baýyrjan Momyshuly atyndaǵy aýyl ákiminiń orynbasary Qaınarbek Bedelbekov.

Joqtaýshysy joqtaı qy­rý­ar qar­­­jy­­­­ny bir jyl boıy bir irgetasqa ǵana­ ­«jum­­­sa­­­ǵan» kom­panııa basshysy kim eken degen ­oı­men, Jýaly aýda­ny ákim­di­gi­niń qurylys jáne sáýlet bóliminiń qyz­metkerlerimen habarlasqanbyz. Olardyń aıtýynsha, 2012 jyly 15 maýsymda Jýa­lyǵa «Dogdý Bıld» kompanııasynyń dırektorymyn dep kelgen adamnyń aty-jóni Nıkolaı Ivanovıch Kovylın eken. Ol atalmysh kompanııasyn Taraz qalasyna tirkepti. Mekenjaıy: Jel­toqsan kóshesi, 11. Sodan Nıkolaı 2013 jyldyń sáýir aıy­na deıin anda-sanda tóbe kórsetip turypty da, joq bolypty. Onyń ornyna Fatıma Begasylqyzy Nurkenova degen «qurylysshy» kelipti. Ol ákimdik qyzmetkerlerine ózin «Dogdý Bıld» kompanııasynyń atqarýshy dırektorymyn» dep tanystyrǵan. Biraq «ótirik aıtqan jerde kóp turma» degendeı, ol da sharýasy shaıqalǵan qurylys basynda kóp turaqtamapty.

– Mindettemesin oryndamaǵany úshin biz kompanııany oblystyq eko­nomıkalyq sotqa berdik. Sot bizdiń paıdamyzǵa sheshim shyǵardy. Endi Nıkolaı Ivanovıch Kovylın bizge kompanııasynyń esep-shotyndaǵy balabaqshaǵa dep bólingen qarjyny qaıtarýy kerek, – deıdi Jýaly aýdany ákimdiginiń qurylys jáne sáýlet bóliminiń bastyǵy Jandos Dáýrenov.

Biraq 90 mıllıondy qaıtara salaıyn dep otyrǵan «Dogdý Bıld» joq. Al onyń dırektory Nıkolaı bolsa Taraz qalasyndaǵy basqa bir kompanııaǵa qyzmetke ornalasyp ketipti desedi.

Ar emes, paıda oılaǵan jerde, árıne, osyn­­daı «qyzyqtar» men «shy­jyqtar» jıi bolyp turady. Mine, mynaý sonyń bir mysaly. Kompa­nııa­syna shyǵý tegi dúdá­maldaý «Dogdý Bıld» degen at qoıǵan Ko­vylın myrza «búldirshinderimizge bala­baqsha salyp beredi» dep úmittengen aýyl turǵyndaryn da, «senderge keregi aqsha ma, má, qalaǵanyńsha al da halyqqa adal qyzmet et!» degen Úkimetti de aldap ketip otyr.

Al Baýyrjan Momyshuly atyn­daǵy aýyl ákiminiń orynbasary Qaı­narbek Bedelbekov «Dogdý Bıld» kompanııasy tastap ketken jumysty jalǵastyrý úshin jańa merdiger tartyp otyrmyz deıdi. Árıne, ol bul mysaldy jetiskennen aıtyp otyrǵan joq. О́ıtkeni, jýalylyqtardyń aýzynda «jyr» bolǵan «Dogdý Bıld» hıkaıa­synan keıin, «baldyrǵandarǵa arnalǵan balabaqsha kelesi jyl­­­­­dyń ne jaz, ne kúz aılarynda paı­dalanýǵa beredi» dep, nyq senimmen aıtýǵa endi aýdan áki­miniń orynbasary da júreksinip qalǵan.

Kósemáli SÁTTIBAIULY,

«Egemen Qazaqstan».

Jambyl oblysy,

Jýaly aýdany,

Baýyrjan Momyshuly aýyly.

Seń qozǵaldy

О́ndiris pen turmysta qoldanylatyn qýat kózderi sheksiz emes. Ony uqypty ári únemdi túrde paıdalana bilmegen elderde túptiń-túbinde onyń sarqylý qaýpi týady. Búginde jıi aýyzǵa alyna bastaǵan «jasyl ekonomıka» uǵymynyń ózi dál osyndaı qaýipten tamyr tartady. Iаǵnı, soǵan sáıkes qory sheksiz emes jylý, elektr sekildi qýat kózderine balamaly tásilder izdestirilmek.

Árıne, bul dál búgingi kúnniń emes, bolashaqtyń isi. Sondyqtan da, Elbasy «jasyl ekonomıka» týraly aıtpas buryn qazirgi kúnde energııa únemdeýdiń bazalyq máselelerin sheshý qajettigin atap kórsetti. Tórtkúl dúnıede qandaı istiń de qadir-qasıetine salystyrmaly túrde baǵa berý arqyly kóz jetkizýge bolady. Osy turǵyda Úkimettiń ótken aıda ótkizilgen keńeıtilgen otyrysynda Memleket basshysy keltirgen salystyrmaly derekter múldem bultartpaıdy. Ony oqyrmannyń nazaryna taǵy bir sala keter bolsaq, Qazaqstanda jylý jelilerindegi shyǵyn 22,1 paıyz. Al, Eýroodaqta ortasha 10 paıyzdy quraıdy. Qazaqstandyq elektr jelilerindegi shyǵyn 14 paıyz bolsa, Qytaı, Koreıa, Japonııada ol nebári 5 paıyz ǵana. Ras, halqymyzdyń dili men o bastaǵy bitim-bolmysy, ashylyp-shashylyp júretin týa bitti qasıeti – búgingi únemshildik máselelermen syıysa bermeıdi. Qazaq poezııasynyń patrıarhy Qadyr Myrza Áli halqymyzdyń jaqsysy men jamany birdeı dep ketken bolsa, sirá, osy únem­shildikten kóbine syrt aınala beretin qasıetimizdi bir jama­nymyzdyń qataryna qoıatyn shy­ǵarmyz. Energııa únemdeý men energııa esepteý jónindegi ózekti máseleler memlekettik organdarǵa da, respýblıka azamattaryna da ortaq. Árıne, únem aýadan jasalmaıdy. Bul úshin turǵyn úı­lerde jylý eseptegishter ornatylýy qajet. Prezıdent atap kór­setkendeı, bul kórsetkishtiń deń­geıi Batys Qazaqstan oblysynda 16 paıyzdy ǵana quraıdy eken.

Sonda qalaı bolǵany? Biz bul saýalǵa jaýap izdeýge tyrystyq. Jylý eseptegish quraldarymen qamtý Oral óńirinde birinshi kezekte ortalyqtandyrylǵan jylýmen qamtamasyz etý kózderinen jylytylatyn kópqabatty turǵyn úılerge qatysty aıtylatynyn anyqtadyq. Sondyqtan da, Batys Qazaqstan oblysynyń energetıka jáne turǵyn úı-kommýnaldyq sharýashylyq basqarmasynda jınaqtalǵan derekter tutastaı oblys boıynsha emes, Oral qalasyndaǵy kópqabatty úılerge baılanys­ty bolyp shyqty. Mundaǵy sońǵy derek oblys ortalyǵynda ornatylǵan jylý eseptegish qu­raldar qajetti kólemniń 25 paıyzyn quraıtynyn kórsetedi. Iаǵnı, munyń ózi Elbasy synynan keıin bul istiń deńgeıi 9 paıyzǵa óskenin kórsetedi. Árıne, muny qanaǵat tutý qıyn-aq. Degen­­men, is ornynan jyljyǵanyn, seń qozǵalǵanyn atap ótýge bolatyn sekil­di. Osy arada «Tabıǵı monopolııalar­men retteletin naryqtar týraly» Zań­ǵa sáıkes monopolııa sýbektileri tuty­nýshylarǵa eseptegish qu­raldardy orna­typ berýge min­detti ekenin aıta ketken jón. Bul is tutynýshylarmen aldyn ala kelisilgen kelisimsharttarǵa sáı­kes rettel­mek. О́z kezeginde olar joǵaryda atal­ǵan zań tar­maq­taryna saı eseptegish qural­dar­dy ornatý men paıdalanǵany úshin óz ýaqytynda tolyq kólemde esep aıyrysýlary kerek.

Oral qalasynda atalǵan is-sharalar keshenin «Jaıyq­­­jy­lýqýat» AQ júrgi­­zedi. Bul kásiporynnyń ınjenerlik-teh­nıkalyq quramy qoldanystaǵy normatıvterge sáıkes eseptegish quraldardy ornatyp, belgili bir deńgeıde shyǵyn shyǵarǵan. Alaıda, onyń ótemi kópqabatty turǵyn úı ıeleri tarapynan ótelmeı, tólenbeı otyr eken. Árıne, tólem júrgizýge tutyný­­­­­­shy­lardyń selsoq, enjar qaraýy, oǵan múd­delilik tanytpaýy, qarjylyq qory onsyz da kelisip turmaǵan jylýmen qamtamasyz etýshi kásiporyndy odan ári tuqyrtady.

Sonymen birge, «Jaıyq­jylýqýattyń» qarjylyq jaǵ­­daıy odan ári tómendeı túsýine «QaztransgazAımaq» AQ arqyly jetkiziletin tabıǵı gaz baǵasynyń dúrkin-dúrkin ósýi de keri áserin tıgizýde. Mundaı kezde atalǵan kásiporynnyń qaladaǵy barlyq turǵyn úılerdi jylý eseptegish quraldarmen qamtýy kúrdelene túsedi.

Bul tyǵyryqtan shyǵýdyń joldary qandaı? «Jaıyqjylýqýat» AQ bıylǵy jyldan bastap ın­vestısııalyq qarajattar esebinen de óziniń qarjy-ekonomıkalyq jaǵdaıyn jaqsartýǵa múmkindik aldy. Onyń alǵashqy nátıjeleri de joq emes. Atap aıtqanda, mundaı ómirsheń kózqaras bıyl kásiporynǵa óz qarajaty esebinen 100 jylý eseptegish quraldaryn satyp alyp ornatýǵa múmkindik beripti. Aldaǵy jyly aksıonerlik qoǵamda ınvestısııalyq baǵdarlama sheńberin odan ári ósirý kózdelgen. Túpki ári basty maqsat – ınvestor qarajaty esebinen kópqabatty turǵyn úılerdi 100 paıyz jylý eseptegish quraldarymen qamtý bolyp otyr.

Mundaı qadamdar ár úıde naqty paıdalanylǵan jylý kólemi qandaı ekenin anyqtaýǵa múmkindik beredi. Ári jylý únemdeý úrdisinde oryn alǵan olqy­lyqtardy anyqtaýǵa septigin tıgizedi. Turǵyn úı sektoryndaǵy energııanyń únem­diligi men tıimdiligi Elbasy atap kór­setkendeı, onyń bazalyq máselelerin she­shýge alǵyshart qalaı alady degen oıdamyz.

Biz joǵaryda batysqazaq­­­­stan­dyq tur­ǵyndardyń jylý eseptegish qural­­­­­­dardy tutynǵany úshin tólem tóleýdi qajet dep taba bermeıtini jóninde jazǵan edik. Dál osy jaıtty tek eseptegish qondyrǵymen shektemeı elektr energııasyn, jylý men gazdy únemdi túrde paıdalanbaý tur­ǵy­sy­nan da sabaqtaýǵa bolady. Bul kóri­nis­tiń ózi oblysta pármendi nasıhat pen tıisti túsinik jumystary óz deńgeıinde júr­gi­zil­meıtinin kórsetedi. Elbasy synynyń ádil­digi men aqıqaty da osynda bolsa kerek.

Endeshe, oblysta bul máselege tikeleı jaýapty jergilikti mem­lekettik organdar, Batys Qa­zaqstan oblysynyń energetıka jáne turǵyn úı-kommýnaldyq sharýashylyq basqarmasy ujymy, oblys ákiminiń energetıka máse­le­lerin qadaǵalaıtyn orynbasary Almaz Badashev shuǵyl serpin týǵyzýy qajet-aq. Tek sonda ǵana Prezıdent tapsyrmasy oıdaǵydaı oryndalmaq.

Temir QUSAIYN,

«Egemen Qazaqstan».

Batys Qazaqstan oblysy.

Aqsha bar, jumys joq

Qudaıa toba, aqsha joq bolsa ǵoı. Qarjy jetpeı jatsa bir bólek. Qaryzdanyp-qaýǵalanyp qurylyspen aınalyssa, aınalyp qana ketpeısiń be?! Bar ǵoı, aqsha degen. Bıýdjetten bólinip jatyr. Memleket aýyzdaryn ashsa boldy, qajetterin taýyp beredi. Biraq jumys júrmeıdi. Jyl basynan beri Qyzylordada respýblıkalyq bıýdjettiń 3 mıllıard, oblystyq bıýdjettiń 2 381,3 mıllıon teńge qarjysy ıgerilmeı qalǵan. Oblystyq qarjy basqarmasynyń basshysy Qaıratbek Sársenbaevtyń aıtýynsha, onyń negizgi bóligi qurylys salasyna tıesili eken. Eń bastysy, mektep, aýrýhana, balabaqshalar kelisimshartta kórsetilgen ýaqytta salynyp bitpeıdi. «Jobalaýshy mekemelerdiń jobalyq-smetalyq qujattardy jasaǵanda kemshilik jiberýi qurylystyń sapasyna áser etpeı qoımaıdy»,– deıdi Qaıratbek Sársenbaev. Sosyn taǵy bir túıtkil bar. Mysaly, tenderde bir qurylys kompanııasy jeńip shyǵady. Al jeme-jemge kelgende, ol búkil sharýany qosalqy merdigerdiń moınyna ilip qoıady. Jaýapkershilik bolmaǵan jerde sapa týraly áńgime aıtýdyń ózi artyq.

Burnaǵy kúni Qyzylorda oblysy ákiminiń orynbasary Nurjan Álibaevtyń tóraǵalyǵymen aımaqtaǵy qurylys nysandaryna qatysty jıyn ótti. Osy májiliste talaı máseleniń basy ashyldy. Endi osy týrasyna oralaıyq.

Aral aýdanynda alty nysannyń qury­lysynda kinárat bar. Birinshi – Toqa­baı aýylyndaǵy 140 oryndyq mek­tep. Nysannyń bas merdigeri – «Glo­bal­Kons­trakshn» JShS. Dırek­tory – M.Izbasarova degen azamatsha, tehnı­­kalyq qadaǵalaýshysy – «Stroı­Tehno­ProektKZAıK» JShS. Al onyń dırektory – A.Jappasbaev myrza. Bıyl mektep qurylysyna 379,8 mıllıon teńge bólingen. Onyń 151,0 mıllıon teńgesi ǵana ıgerilgen. Búginde bas merdiger shart­­taǵy mindettemelerin oryndamaǵany úshin sotqa talap-aryz joldanyp, sottyń she­shimi boıynsha qurylys jumystary toqta­tylǵan.

Ekinshi – Sekseýil kentindegi 150 oryndyq klýb. Bas merdigeri – «Arǵyn Qurylys» JShS. Dırektory – A.Áj­mu­­hammedov, tehnıkalyq qada­ǵa­laýshysy – «Dostarstroıgrýpp» JShS. Onyń basshysy – S.Qaıyrov. Bas mer­d­i­ger «Arǵyn Qurylys» JShS boıyn­sha qylmystyq is qozǵalyp, qazirgi tańda merdiger tarapynan debıtorlyq qaryzdaryn jabý jumystary júrgizilip jatyr.

Úshinshi kemshilik, Aralqum jáne Qamystybas aýylyndaǵy dárigerlik ambýlatorııalardyń bas merdigeri «Maı­dan-Qurylys» JShS-niń dırektory E.Smaı­lov pen tehnıkalyq qadaǵalýshysy «Qyzylorda Bah-NýrStroı» JShS-niń dırektory S.Úrimbaevtarǵa qatysty. Osy jyly atalǵan nysandardyń qurylysyna 170,7 mıllıon teńge bólinip, onyń 56,3 mıllıon teńgesi ǵana iske asqan. Ny­sandardyń qurylys jumystary belgilengen kesteden keshigýde.

Tórtinshi – Aral qalasyndaǵy 300 oryndyq mektep. Bas merdigeri – «InjStroı Qyzylorda» JShS. Dı­­­­rek­tory – Ú.Balataev. Bul nysannyń da teh­nıkalyq qadaǵalaýshysy joǵa­ryda aıt­qan S.Qaıyrov basqaratyn «Dos­tar­­stroıgrýpp» JShS. Mektep qury­ly­syna 135,5 mıllıon teńge bólinip, onyń 46,8-i­ ıgerilgen. Qurylys-montaj ju­mys­ta­r­y­nyń qarqyny óte tómen. Aqsha bar. Jumys júrmeıdi. Kúlkili eken, birtúrli.

Besinshi – Jalańash aýylyndaǵy 90 oryndyq balabaqsha. Bas merdigeri – Ú.Balataev basqaratyn «InjStroı Qy­zylorda» JShS. Al tehnıkalyq qada­ǵalaýshysy – «Aımereke» JShS. Dırek­to­ry – A.Baıkenje. Buǵan da 220,3 mıllıon teńge bólinip, onyń 90,2 mıllıon teńge­sine ǵana jumystar atqarylǵan. Sonda júz mıllıon teńgeden artyq soma qur jatyr degen sóz. Búginde bas merdiger «Inj­Stroı Qyzylorda» sharttaǵy min­det­temelerin oryndamaǵany úshin sotqa talap-aryz joldanyp, debıtorlyq qaryz­daryn jabý jumystaryn júrgizýde. Al nysan salǵyrttyqtyń kesirinen bıyl tap­syrylmaıtyn boldy.

Altynshy – Qara­sha­lań jáne Qosaman aýyldaryndaǵy 100 oryndyq mektep. Mundada belgili bir pro­b­lemalar bar. Degenmen, nysandardy jyl­dyń aıaǵyna deıin paıdalanýǵa berý bo­­­ıynsha tıisti jumystar atqarylýda eken.

Baıqap otyrsaq, qurylysynda kinárat bar nysandar osy Aral aýdanynda kóp eken. Oblys ortalyǵynan shalǵaı jatqannan soń ba, álde basqa sebepteri bar ma, nege bulaı ekenin bilmedik. Sondaı-aq, aýdan basshylyǵyna «nege qadaǵalamadyń?» deı almaısyz. О́ıtkeni, oǵan olardyń quzyreti júrmeıdi.

Jalaǵash aýdanynda bir problemalyq nysan bar. Ol – Jalaǵash kentindegi 250 kelýshige arnalǵan emhana. Bas merdigeri –«Dostyq-N» JShS. Dırektory – Á.Shyn­taev. Tehnıkalyq qadaǵalaýshysy – álgin­de ǵana eki márte tilimizge oralǵan «Dos­tarstroıgrýpp» JShS. Qurylys basqarmasy merdigerge nysandy ýaqy­tynda aıaqtap, ótkizýdi tapsyryp otyr eken. Deıturǵanmen, jumys baıaý júrip jatqandyǵyn eskersek, talaptyń qansha­lyqty oryndalatyny belgisiz.

Syrdarııa aýdanynda Tereńózek ken­tin­degi sporttyq-saýyqtyrý kesheniniń qur­ylysy da aqsap tur. «Aıdana» JShS deıtin bas merdigerdiń dırektory – A.Kishkeneev. Tehnıkalyq qadaǵalaýshysy – «Aımereke» JShS. Buǵan da talaptar qoıylǵan. Nátıjesi «áı, qaıdam?»

Shıeli aýdanyndaǵy shıki qurylysqa Eńbekshi aýylyndaǵy 300 oryndyq mektep jatady eken. Bas merdigeri – «Daryn-J» JShS. Dırektory – J.Ateev. Qurylys mekemesiniń basshysy jumys bastalǵanda bir kelgen kórinedi. Odan keıin tóbesin kórsetpegen. Osydan-aq jaýapkershiliktiń qanshalyqty ekenin bile berińiz. Nysannyń tehnıkalyq qadaǵalaýshysy – «Jaıyq Stroı Injınırıng» JShS. Onyń basshysy – B.Ospanov.

Al Qyzylorda qalasynda 200 kelýshige arnalǵan perınataldyq ortalyq taza saqaldy qurylysqa aınalǵan. Sońǵy kezderde ǵana onda jumystyń júrip jatqany baıqalady. Nysannyń bas merdigeri – «Alıans» JShS, dırektory – N.Baıtıkov. Al tehnıkalyq qada­­­ǵalaýshysy – «Dostarstroıgrýpp» JShS.

Budan bólek, jobalaý-smetalyq qujattardy daıyndaýda da irkilister bar. Olar: Qazaly aýdanynyń Birlik aýylyndaǵy 140 oryndyq mektep ( 3,5 mıllıon teńge), osy aýdandaǵy Áıteke bı kentindegi 600 oryndyq mektep (7,3 mıllıon teńge), Jańaqorǵan aýdanynyń Keńes aýylyndaǵy 150 oryndyq klýb (4,9 mıllıon teńge), Qyzylorda qalasyndaǵy 300 tósektik kópsalaly aýrýhana (26,3 mıllıon teńge). Sonymen qatar, memlekettik saraptamanyń oń qorytyndysy alynǵan jobalyq-smetalyq qujattardan kóptegen kemshilikter men qatelikterdiń bary anyqtalǵan. Keıbir jobalar qurylystyń salý merzimderi tipti sáıkes kelmeıdi. Mysaly, 300 oryndyq mekteptiń qury­­­lysy 6 aı júretin bolsa, kólemi odan eki ese az 150 oryndyq klýbtyń jumysy 11 aıǵa sozylady eken. Ári-beriden soń eshqandaı logıka joq. Osydan kelip qury­lys jumystarynyń merzimine jáne sapasyna keri áseri tıedi. Sondaı-aq, jobalyq-smetalyq qujattardyń memlekettik saraptamadan ótý merzimi óte uzaq. Bul óz kezeginde jobalyq-smetalyq qujattardyń jáne qurylys jumystarynyń merziminde júrgizilýine, bólingen qarjynyń tolyq ıgerilýine ákelip soqtyrady.

Jıyn barysynda budan ózge de kóp­tegen máseleler talqyǵa tústi. Oblys áki­miniń orynbasary Nurjan Álibaev qu­ry­lys kompanııalarynyń basshylaryna ny­sandardy belgilengen ýaqytta aıaq­taý­dy jáne sapaly jumys isteýdi tapsyrdy.

Erjan BAITILES,

«Egemen Qazaqstan».

QYZYLORDA.