Memleket basshysy birqatar túıtkildi máselelerge tolyǵyraq toqtaldy.
Birinshi másele. Halyqty testileýden ótkizý qarqyny tómendegen. Kúnine orta eseppen, 40 myńnan 60 myńǵa deıin zertteý múmkindigi bar 18 myń zertteý júrgiziledi. Zerthanalardyń júktemesi 40% quraıdy. Biz naqty jaǵdaıdy bilýimiz kerek. Sondyqtan testileý kólemin ulǵaıtý úshin sharalar qabyldaý qajet.
Ekinshi másele. Biz jaz aılarynda dári-dármek tapshylyǵyn aıqyn sezindik. Meniń tapsyrmam boıynsha naqty jumys atqaryldy. Atap aıtqanda, eki aıǵa jetetin qor jasaqtalyp, eń qajetti degen dári-dármektiń tizimi ulǵaıtyldy. Ony syrttan ákelý jáne tirkeý tártibi jeńildetildi. Biraq óńirlerde dári-dármekterdi turaqtandyrý qorlarynyń kólemi jáne daıyndyq jumystary birkelki emes. Mysaly, Batys Qazaqstan jáne Aqtóbe oblystarynda – eki júz mıllıon teńgeden. Mańǵystaý oblysynda – úsh júz mıllıon teńge.
Al Nur-Sultan qalasynda bir mıllıard alty júz mıllıon teńge, Almatyda – bes mıllıard teńge.
Densaýlyq saqtaý mınıstrliginiń óńirlerdegi daıyndyq barysyna bergen baǵasymen tanystyq. Soǵan sáıkes, Mańǵystaý jáne Almaty oblystarynda emhanalar men aýrýhanalardyń daıyndyǵy nashar ekendigi anyqtalyp otyr. Osy olqylyqtardy Úkimet pen ákimder dereý túzetýge mindetti.
Úkimetke ákimdermen birlesip, eki apta ishinde turaqtandyrý qorlaryn belgilengen normatıvke sáıkes jasaqtaýdy jáne medısına ınfraqurylymynyń tolyq daıyn bolýyn qamtamasyz etýdi tapsyramyn.
Úshinshi másele. Monıtorıng júrgizetin toptardyń belsendiligi tómendep barady. Áleýmettik jeliler arqyly túrli jıyn-toılarda túsirilgen fotosýretter taralýda. Monıtorıng júrgizetin toptar tekseristerin azaıtty. Bul rette, karantın sharalary saqtalmaı, zań buzý derekteri kóbeıip ketti.
Ákimderge monıtorıng júrgizetin toptardyń jumysyn jandandyrýdy tapsyramyn. Vedomstvoaralyq komıssııa osyny qatań baqylaýǵa alýǵa tıis.
Tórtinshi másele. Birqatar tapsyrmany oryndaýda shıkilik bar. «SK-Farmasııa» men Medısınalyq saqtandyrý qoryna qylmystyq tergeý júrgizý áserinen densaýlyq saqtaý salasyn sıfrlandyrý prosesi is júzinde toqtap qaldy.
Besinshi másele. Pandemııanyń ekinshi tolqyny aıasynda negizgi salmaq qaıtadan dárigerler túsedi. Bizdiń negizgi resýrsymyz – dárigerler. Medısına qyzmetkerlerin qoldaý qajettiligine eshkim kúmán keltirmeıdi. Meniń tapsyrmam boıynsha ekinshi jartyjyldyqta dárigerlerge ústemaqy tóleýge qosymsha 150 mıllıard teńgeden astam qarjy bólindi. Alaıda, ústemaqy men saqtandyrý tólemderin alý kezinde kezdesetin bıýrokratııalyq kedergiler áli de bar.
Altynshy másele. Úkimet medısınalyq kómektiń ózge túrlerin de kórsetýdi umytpaýǵa tıis. Ana men bala densaýlyǵyn qorǵaý – negizgi basymdyqtyń biri. О́kinishke qaraı, ana ólimi kórsetkishi barlyq óńirde birneshe ese kóbeıip ketti.
