1906 jyly Reseı akademııasy Tolstoıdy Nobel syılyǵyna usynyp, Stokgolmǵa hat jiberedi. Sonda Lev Nıkolaevıch bul «yńǵaısyzdyqtyń» aldyn alý úshin shyǵarmalaryn fın tiline aýdaratyn jaqyn dosy – Arvıd Iаrnafeldke qolqa salypty. Odan Shvesııadaǵy tanystary arqyly syılyqty ózine bermeýin suraýdy ótinedi. Syılyq berilip qoıǵan jaǵdaıda bas tartýdyń yńǵaısyz bolatynyn da aıtady. Al Iаrnafeld bul ótinishti oryndap, 1906 jylǵy Nobel syılyǵy ıtalııan aqyny Djozýe Kaddýchıge buıyrady.
«1901 jyly endi ǵana berilip jatqan, áli aınalasynda daý bastalyp úlgermegen syılyq jaıynda «qarııanyń» qulaǵdar bolýy da kúmándi jaǵdaı. Shvesııa hatshysy Karl Vırsen Tolstoıdyń ólmeıtin shyǵarmalar týdyrǵanyn moıyndaı otyryp, onyń syılyqty ıelenýine múldem qarsy bolǵany» týraly jazady Hýsan Ermatov óziniń «Nobel syılyǵynyń ıegerleri» atty kitabynda.
Tolstoı aqsaqal álemdegi eń «ulyq» syılyqtan sanaly túrde bas tartqan soń ádebı orta qyzý talqyǵa salyp, bul kútpegen sheshimniń jyry birazǵa deıin basylmady. Oqyrman hattary da lek-legimen aǵyldy. Bári de «Iаsnaıa polıanalyq» jazýshyny Nobelge laıyq kóretinderin jetkizedi. Osyndaı hattar aǵymynan soń Lev Tolstoı: «Qadirli de qurmetti, baýyrlar! Nobel syılyǵy maǵan berilmegenine qýanyshtymyn. Bul birinshiden, zulymdyq keltirýi múmkin bolǵan aqshalardy sarp etetindeı aýyr jumystan bosatty, ekinshiden, múlde beıtanys, biraq óte qadirli osynshama adamdardan jyly lebizdi hattar alý – men úshin úlken mártebe!» dep hat jazady.
Nobel syılyǵynyń tarıhynda klassık jazýshynyń bul qadamyn odan keıin, sanaly túrde (bálkı, májbúr bolǵandar da bar shyǵar) taǵy segiz avtor qaıtalaǵan.
