О́z saýalynda depýtat qazirgi tańda "Quryq" teńiz porty Qazaqstannyń eksporttyq áleýetin arttyrýda mańyzdy ról atqaratynyn atap ótti. 2016 jyly elimizdiń kólik-logıstıkalyq ınfraqurylymyn damytý maqsatymen "Quryq" teńiz parom kesheni salynyp, paıdalanýǵa berildi. Keshenniń temirjolmen júk tasymaldaý qýaty jylyna – 4 mıllıon tonnany, al avtomobıl jolymen jylyna 2 mıllıon tonnany quraıdy.
"Portqa júk jetkizý merzimin jáne soǵan baılanysty shyǵyndardy qysqartý úshin 2016 jyly "Shalqar-Beıneý" temirjoly salynyp, paıdalanýǵa berildi. Joldyń uzyndyǵy 471 shyqyrym. Bul "Quryq" portyna baratyn joldy 500 shaqyrymǵa deıin qysqartýǵa múmkindik berdi. Alaıda, áli kúnge deıin portqa avtomobıl jolymen júk jetkizetin ońtaıly baǵdardy tańdaý máselesi sheshilmeı keledi", – dedi S.Aldashev.
Sondaı-aq senator búginde avtojol arqyly atalǵan portqa júk jetkizý úshin "Yrǵyz-Aqtóbe-Maqat-Beıneý-Quryq" baǵytyn júrip ótip, qosymsha 1250 shaqyrym artyq jol júrýge týra keletine nazar aýdardy.
Osy rette depýtat "Nurly jol" baǵdarlamasynyń II kezeńi aıasynda 2020-2025 jyldary 11 myń shaqyrym avtomobıl jolyn qaıta jóndeý jáne salý boıynsha 30 jobany iske asyrý josparlanǵanymen, "Beıneý-Shalqar" jobasyn qarjylandyrý kózi anyqtalmaǵanyn atap ótti. Sondyqtan "Quryq" portyna júkti jyldam jetkizý máselesi ashyq kúıinde qalyp otyr.
Sonymen qatar senator "Shalqar-Beıneý" temirjolyn salǵan kezdegi jobalyq jumystardyń materıaldaryn jáne atalǵan temirjoldyń ınfraqurylymyn paıdalaný arqyly bul jobany qysqa merzimde ári az shyǵynmen iske asyrýǵa bolatynyn jetkizdi.
Súıindik Aldashev atalǵan jol qurylysy el azamattaryna Kaspıı teńiziniń jaǵalaýyna qysqa baǵytpen jetýge múmkindik berip, ishki týrızmniń damýyna jaǵdaı týǵyzatynyn da tilge tıek etti.
