«RIA Novostı» agenttiginiń habarlaýynsha, kelissózderge Reseı tarapy muryndyq bolǵan. BBC arnasynyń málimetterine súıensek, jıynǵa Reseıdiń syrtqy ister mınıstri Sergeı Lavrov, Ázerbaıjannyń syrtqy ister mınıstri Djeıhýn Baıramov, Armenııa syrtqy ister mınıstri Zohrab Mnasakanıan qatysqan. Kelissóz uzaqqa sozylyp, 10 saǵattan asty. Arasynda bir saǵat úzilis jasaldy.
Kezdesý tolyǵymen jabyq formatta ótkendikten, bastalǵanǵa deıin esh tarap buqaralyq aqparat quraldaryna málimdeme jasaǵan joq. Tek jıynnan keıin Reseıdiń syrtqy ister mınıstri Sergeı Lavrov «tynyshtyq tártibiniń» naqty erejeleri qosymsha kelisiletinin jetkizdi.
Kelisimge sáıkes, 2020 jylǵy 10 qazanda saǵat 12:00-den bastap áskerı tutqyndardy jáne basqa da ustalǵan adamdar men deldaldyq kezinde qaza tapqan adamdardyń máıitterin almasý úshin jáne Halyqaralyq Qyzyl Krest komıtetiniń krıterıılerine sáıkes gýmanıtarlyq maqsatta atysty toqtatý týraly sheshim jarııalandy.
Sondaı-aq atysty toqtatý rejıminiń naqty parametrleri qosymsha kelisilmek. Budan bólek, Ázerbaıjan men Armenııa EQYU-nyń Mınsk tobynyń teń tóraǵalarynyń deldaldyǵy arqyly bitimgershiliktiń bazalyq qaǵıdattary negizinde beıbit kelisimge jedel qol jetkizý maqsatynda sýbstantıvtik kelissózderge kirisedi. Aldaǵy ýaqytta kelissózder formaty ózgermeıtin bolyp sheshim qabyldandy.
Ázerbaıjan men Armenııa syrtqy ister mınıstrleri juma kúni Taýly Qarabaq boıynsha konsýltasııa jasasý úshin Máskeýge ushyp kelgen edi. Kelissózder bastalmastan buryn Ázerbaıjan prezıdenti Ilham Álıev halqyna úndeý jarııalady. Onyń aıtýynsha, Ázerbaıjan Armenııaǵa shıelenisti beıbit jolmen sheshý úshin «sońǵy múmkindik» beredi.
«Shıelenis qazir áskerı jolmen sheshilip jatyr, saıası jolǵa sodan keıin júginemiz. Otyz jylǵa jýyq kelissóz júrgizip kelemiz. О́zgeris boldy ma? Bizge jerimizdiń santımetrin bolsa da qaıtardy ma?» dedi I.Álıev.
Sondaı-aq Ázerbaıjan armııasynyń birneshe eldi mekendi basqynshylardan azat etkenin jetkizdi. Bulardyń qatarynda Gadrýt kenti, Chaıly, Iýhary Gıýzlek, Gorazylly, Gyshlag, Garadjally, Efendılıar, Sýleımanly, Sýr aýyldary bar.
«Osy aýyldar men Gadrýt kentin jaý qolynan azat etý – bizdiń tarıhı jeńisimiz. Ázerbaıjan basyp alynǵan jerlerin azat etedi. Maıdannan kún saıyn jaǵymdy jańalyq kelip jatyr. Ofıserler men soldattar kún saıyn ózderiniń jaýyngerlik tapsyrmalaryn abyroımen oryndady», dedi I.Álıev.
Ilham Álıev Taýly Qarabaqtaǵy soǵysty túbegeıli toqtatý úshin armıan áskerleri ózderi buǵan deıin basyp alyp, otyz jyl boıy bermeı kele jatqan terrıtorııasyn tolyq qaıtarýy kerek. Muny olar osy jerlerden áskerlerin shyǵarý kestesin jasap berý arqyly júrgizýge tıis. Armenııa Taýly Qarabaqtyń Ázerbaıjan terrıtorııasy ekenin moıyndaýy tıis. Mine, osy jaǵdaıda ǵana Máskeýdegi kelissóz eki jaqtyń urys qımyldaryn tolyq toqtatýyna sebep bolady.
Alaıda eki tarap ta kóp uzamaı kelisimdi buzǵany úshin qarama-qarsy jaqty aıyptady. Ázerbaıjan qorǵanys mınıstrliginiń derekterine súıensek, oq atýdy toqtatý jónindegi kelisimge qaramastan Armenııa tarapy Terter jáne Agdam aýdandaryn atqylaǵan.
BUU-ǵa múshe memleketter Taýly Qarabaqty Ázerbaıjannyń jeri sanaıdy. 1990-jyldary Armenııamen bolǵan soǵystyń saldarynan Ázerbaıjan Taýly Qarabaq aımaǵynan aırylyp qaldy. Soǵys saldarynan júzdegen myń ázerbaıjan bosqynǵa aınaldy. Alaıda BUU Qaýipsizdik keńesiniń birneshe qarary boıynsha atalǵan óńir Ázerbaıjanǵa tıesili.
