"Aýyl sharýashylyǵy mınıstrligi aǵymdaǵy jyldyń 7 qazanynda oblys ákimdikterine qus tumaýynan ólgen qustardyń ortasha naryqtyq qunyn óteý úshin qujattar paketin qalyptastyrý kezinde jeke qosalqy sharýashylyq ıelerine kómek kórsetý qajettiligi týraly hat joldady. 11 qazanda 2 585 qus boıynsha qujattar daıyndaldy, ótemaqynyń jalpy somasy 8 878 364 teńgeni quraıdy", dedi AShM Veterınarııalyq baqylaý jáne qadaǵalaý komıteti ókili.
Buǵan deıin T.Qabdoldanov OKQ brıfınginde JQSh-da qustardyń táýliktik ólimi 22 basqa deıin qysqarǵanyn habarlady. Jańa jaǵdaılar tek Soltústik Qazaqstan oblysynyń jeke aýlalarynda tirkeldi. Respýblıkanyń basqa óńirlerinde 11 qazanda ólim tirkelgen joq. Sońǵy 10 kúndegi dınamıkany eskere otyryp, Veterınarııalyq baqylaý jáne qadaǵalaý komıtetiniń mamandary Qazaqstanda qus tumaýynan qustardyń ólimi tolyq toqtaǵanyn atap ótti.
"Qyrkúıek aıynyń ortasynan bastap jeke qosalqy sharýashylyqtarda joǵary patogendi qus tumaýyn juqtyrýdyń saldarynan 25 myńǵa jýyq qus ólimi tirkeldi. Sonymen qatar, ınfeksııa oshaqtarynan 20 177 bas qus tárkilendi. Osylaısha, qazirgi ýaqytta barlyǵy jeke qosalqy sharýashylyqtaǵy 45 110 bas qusqa, onyń ishinde 27 393 bas taýyq, 777 kúrketaýyq, 10 141 qaz, 6 799 bas úırek úshin ótemaqy beriledi", dep naqtylady spıker.
Sonymen qatar ol qus fabrıkalarynda ólim-jitimniń tolyǵymen toqtaǵanyn habarlady. Eki kásiporyn – "Beskól qus fabrıkasy" JShS jáne "Agroınterptısa" qus fabrıkalaryna 361 647 qus úshin ótemaqy tólenedi.
Sonymen qatar, Arqalyq qus fabrıkasynda ólgen qustyń tek 1/3 bóligi, shamamen 256 myń taýyq qus tumaýynan emes, óndiristegi jeldetýdiń ýaqytsha bolmaýynan tunshyǵyp ólgen. T.Qabdýldanov Qazaqstanda 64 qus fabrıkasy jumys isteıtinin jáne olardyń tek ekeýinde ǵana qus tumaýy saldarynan ólim bolǵanyn atap ótti.
"Qus fabrıkalarynda tekserý júrgizý kezinde olardyń ıeleri veterınarııalyq-sanıtarııalyq talaptardy saqtamaǵany anyqtaldy. Atap aıtqanda, qus fabrıkalarynyń aýmaǵynda jem-shópke erkin qol jetkize alatyn jabaıy jáne qonys aýdaratyn qustar tabyldy", dedi T.Qabdoldanov.
