Dına – Qazaqstan men BUU arasyndaǵy kelisimimen shetelge volonterlik qyzmet atqarýǵa attanǵan jeti otandasymyzdyń biri. Bilikti jas maman qazirdiń ózinde bedeldi uıymnyń jumysyna etene aralasyp, halyqaralyq saıasat salasynda mol tájirıbe jınap júr. Almatyda dúnıege kelip, el astanasynda boıjetken 26 jastaǵy otandasymyz qazir Ystanbulda Birikken ulttar uıymynyń Damý baǵdarlamasynyń qurylymynda jumys isteıdi.
Qaı salany alsaq ta, qazaq jastarynyń búgingi bet alysy kóńilge qýanysh syılaıdy. Bizdiń keıipkerimizdiń bedeldi uıymnyń volonteri atanyp, Túrkııa asýyna qazaqstandyq taraptyń da qosqan úlesi zor. «Volonter jyly» sheńberinde jasalǵan kelisimge saı Qazaqstan úkimeti BUU qataryndaǵy 7 volonterdiń birjyldyq tájirıbesin tolyqtaı qarjylandyrady. Bul qadam qazaqstandyq órenderdiń jan-jaqty damyp, kásibı jetilýine septigin tıgizetini sózsiz.
Dına Shvesııa ýnıversıtetinde tálim alyp, keıinnen memlekettik saıasat mamandyǵy boıynsha Nıderland pen Ulybrıtanııa elderiniń joǵary oqý oryndarynda magıstratýrany támamdady. Osy arada elge qaıtyp kelip, BUU jáne ózge halyqaralyq uıymdarmen tyǵyz qarym-qatynasta boldy. Onyń Qazaqstan atynan halyqaralyq volonter atanǵan jeti adamnyń biri bolýy da kezdeısoq emes. Dına dál osy kezde BUU sekildi bedeldi qurylymnyń bir múshesi bolýdy ózine maqsat etken eken.
– Men ýnıversıtette oqyp júrip BUU sekildi halyqaralyq uıymda jumys istegim keldi. Shvesııada oqýymdy aıaqtaǵan soń elge oralyp, júregim qalaǵan isti izdeı bastadym. Qazaqstanǵa 2015 jyly keldim. Eki jyl ishinde BUU jáne basqa da halyqaralyq uıymdarda qyzmet etip úlgerdim. Odan keıin bilimimdi ushtaý úshin Eýropaǵa qaıta attandym, – deıdi D. Aqylbekova.
«Izdegen jeter muratqa» demekshi, osyǵan deıin jasaǵan áreketi, tabandylyǵy men tańdaǵan baǵyty Dınany jolynan adastyrmaı, búgingi nátıjege jetkizdi. Álemdegi eń bedeldi uıymdardyń birinde qyzmet etý barlyǵyna buıyra bermeıtin baq. Bul onyń bilimi men kásibı biliktiliginiń adamı qasıetterimen ushtasyp jatqanyn bildirse kerek.
BUU quramyndaǵy eń qaıyrymdy volonterler baǵdarlamasynyń múshesi bolyp, shetelde qyzmet etýge múmkindik alý da ózdiginen kelmeıdi. Mundaı jaýapty iske irikteý talaptarynyń joǵary bolatyny aıtpasaq ta túsinikti. Qazaqstan boıynsha júzden júırik shyqqan sanaýly jastyń biri bolý – Dınanyń bolashaǵynan úmit kúttirer bilikti maman bolatynynyń dáleli. Qaıyrymdy isti negizine alǵan baǵdarlamanyń múshesi ataný úshin izgi nıetińdi kórsetetin baı tájirıbeńniń bolýy mańyzdy. Dına kishkentaıynan-aq óziniń elgezek minezimen kózge túsken. Mektep qabyrǵasynda túrli is-sharalarǵa belsene qatysyp, aǵylshyn tilinen aýdarma jasaý kerek bolsa, birinshi qol ushyn sozatyn.
Dına ózin volonterlik qozǵalystyń tolyqqandy múshesi retinde sezingen alǵashqy sharasyn úlken yqylaspen eske alady. «VII Azııa Qysqy oıyndarynda baspasóz ortalyǵynda birneshe aı boıy shetelden kelgen jýrnalısterge kómektestim. Olardyń oıynshylardan suhbat alýyna, jergilikti turǵyndarmen kedergisiz sóılesýine, elimizde erkin júrip-turýyna qolǵabys ettim» dep eske aldy keıipkerimiz.
Jalpy, Qazaqstanda ótken alǵashqy halyqaralyq deńgeıdegi iri sharalardyń biri osy Azııa Qysqy oıyndary edi. Ortalyq Azııadaǵy volonterlik qozǵalysqa serpilis bergen de osy shara desek qatelespeımiz.
Al Birikken ulttar uıymynyń eriktiler baǵdarlamasymen tanystyǵy taǵy bir elordada ótken bedeldi shara – EXPO-2017 kezinde bastalypty. Dına BUU-nyń Damý baǵdarlamasynda kommýnıkasııa salasymen baılanysty jumystarmen aınalysqan. Salada mol tájirıbe jınaǵan keıipkerimiz elimizdegi volonterlik qyzmettiń bastaýynda boldy desek artyq aıtqanymyz emes. Dálirek aıtsaq, ol – Qazaqstannyń halyqaralyq qozǵalystyń múshesine aınalǵan sátiniń kýágeri ári qatysýshysy. Jastaıynan izdenimpazdyǵymen, bilimge qushtarlyǵymen kózge túsken Dına búginde halyqaralyq bedeldi uıymda Qazaqstandy álemge tanystyryp júr.
Áńgime barysynda Dınamen volonterliktiń qoǵamdaǵy róli men elimizdegi jaǵdaıy jaıly da sóz qozǵadyq.
– Volonterlik qoǵamda qordalanǵan áleýmettik máselelerdi sheshýge aıtarlyqtaı úles qosatynyna senimdimin. Qazir álemde kóptegen uıymdar óz jobalaryna volonterlerdi belsendi qatystyrady. Men osy salaǵa memleket kórsetken orasan zor qoldaýdy atap ótkim keledi. «Volonterlik qyzmet týraly» zańnyń qabyldanýy, «Volonter jylynyń» jarııalanýy, sondaı-aq ózim qatysqan BUU halyqaralyq volonterler jobasyn qoldaý sekildi sharalar elimizdegi qozǵalystyń adymdap damýyna úles qosty», deıdi Dına Aqylbekova.
Qazir Dına Ystanbulda halyqaralyq uıymdarda, damýshy elderde kishi jáne orta bızneste, odan bólek úkimettik emes uıymdarda sıfrly ınnovasııalyq sheshimderdi engizý boıynsha qyzmet atqarady. Bul joba qazaqstandyq mamandar úshin taptyrmas múmkindik ekenin alǵa tartty.
– Men Qazaqstannyń alǵashqy halyqaralyq volonterleriniń qatarynda bolǵanyma óte qýanyshtymyn. Sondaı-aq úlken jaýapkershilikti sezinemin. Bul – qazaqstandyq mamandar úshin ózderin jahandyq uıymda synap kórýge, teńdesi joq halyqaralyq kásibı tájirıbe jınaýǵa tamasha múmkindik der edim, – deıdi volonter.
Dına Aqylbekova kelisim boıynsha berilgen 12 aıda bilimi men biliktiligin jetildirip, BUU-nyń aımaqtyq jáne jahandyq deńgeıdegi qyzmeti týraly kóbirek aqparat alatynyna senimdi. Uıym qataryndaǵy volonterlerdiń damýyna kóp jaǵdaı jasaıtynyn da atap ótti. Ol Coursera, LinkedIn Learning, Rosetta Stone sekildi platformalarda tamyz aıynan bastap bos ýaqytynda sıfrlandyrý boıynsha 5 kýrs alyp úlgeripti. Odan bólek otandasymyz túrik tilin meńgerip júr.
Bolashaqta Dına sıfrlandyrý salasynda úırengen bilimi men tájirıbesin el ıgiligine qoldanýǵa daıyn ekenin jetkizdi.
– Qazirgi tapsyrmam aıaqtalǵan soń, BUU-da sıfrlandyrý boıynsha jumysymdy jalǵastyrǵym keledi. О́ıtkeni men memleketterdiń turaqty damýy úshin sıfrly tehnologııalardyń áleýetine senemin. Jas maman retinde bolashaqta qaı salada, qaı baǵytta damýymdy túsiný úshin qazirgi tájirıbeniń paıdasy zor dep esepteımin. Men alǵan kásibı bilim men daǵdylar Qazaqstanda qajet bolatynyna senimdimin. Qajet bolsa men BUU-nyń eń jaqsy tájirıbelerin Qazaqstanǵa ákelýge daıynmyn, – dep qorytyndylady áńgimesin halyqaralyq volonter.
Jaqynda «Birgemiz» respýblıkalyq volonterler front-ofısi Dınany qonaqqa shaqyryp, halyqaralyq volonter bolýdyń qyr-syryn suramaq eken. Keıipkerimizdiń tájirıbesi ózge otandastarymyzǵa da qyzyq bolary sózsiz. Ásirese volonterlikpen aınalysyp júrgen azamattardy Dına Aqylbekovanyń jetistigi odan saıyn yntalandyra túsedi dep úmittenemiz.
