Sybaılas jemqorlyqqa qarsy qyzmettiń Nur-Sultan qalalyq departamentiniń jetekshisi Jazıra Jylqyshıevanyń aıtýynsha, búgingi tańda 3 kodeks pen 10 zańǵa ózgeris engizilgen.
«Jemqorlyqqa qarsy zańnamada mańyzdy normalar qabyldandy. Birinshi basshylardyń jemqorlyq týraly eskertpegeni úshin jaýapkershiligi kúsheıdi. Bul úshin tártiptik jaýapkershilik qarastyrylǵan. Turaqty túrde qyzmetkerlerge túsindirý leksııalary men semınarlar ótkizip turý kerek. Budan bólek, jemqorlyq táýekelderi boıynsha saraptamalar júrgizý qajet. Bul profılaktıka úshin óte mańyzdy», dep atap ótti Jazıra Jylqyshıeva.
Onyń aıtýynsha, jemqorlyq shekteýlerin qabyldaǵan tulǵalarǵa syılyq alýǵa tolyq tyıym salynǵan. Spıker jemqorlyq quqyqbuzýshylyqqa jaýapty tulǵalardyń sany kóbeıgenin de jetkizdi. Endi oǵan birinshi basshylardan bólek, memlekettik satyp alýǵa jaýapty qurylymdyq bólimshelerdiń jetekshileri de kiredi.
«Qazsýshar» RMK bas dırektory jıyn barysynda kásiporynda jemqorlyq profılaktıkasy boıynsha ótkizilip jatqan jumystar týraly habardar etti.
«Bizdiń kásiporynnyń qyzmet aıasy ıntensıvti jáne olar keń salany qamtıdy. Búgingi kezdesýge el aýmaǵyndaǵy barlyq qyzmetkerlerimizdi qatystyryp otyrmyz. Sebebi bul sharany óte mańyzdy dep bilemiz. Jemqorlyqqa qarsy zańnyń jańarǵan normalaryn bári bilýi tıis dep esepteımiz. Biz profılaktıkalyq sharalardy kúndelikti qabyldaımyz, atalǵan normalardyń oryndalýyn qatań qadaǵalaımyz. Jalpy aıtqanda, bul baǵyttaǵy jumys kúsheıedi», dedi A.Qasenov.
Onyń pikirinshe, atalǵan jumysqa kásiporyndaǵy ashyqtyqty qamtamasyz etip, jemqorlyqqa qarsy mádenıetti qalyptastyratyn «Adaldyq alańy» jobalyq keńsesi oń áserin tıgizedi. Is-shara sońynda Jazıra Jylqyshıeva barlyq qatysýshylarǵa alǵys bildirip, jemqorlyqqa qarsy kúreste oń nátıjege tek birlesip kúsh salǵanda ǵana jetýge bolatynyn atap ótti.
