О́ńirlik jedel shtab jıynynda karantındik sharalardy kúsheıtý týraly birqatar sheshim qabyldandy. Sonymen seısenbiden bastap qoǵamdyq tamaqtaný nysandaryna saǵat 23:00-ge deıin ǵana jumys isteýge ruqsat etiledi. Ashanalar men kafe, meıramhanalarda birge tamaqtanýshylardyń sany 30-dan aspaýy tıis. Sondaı-aq ashyq attraksıondardyń jumysy ýaqytsha toqtatyla turady. Bul shekteý túrleri kúndelikti talap etiletin bolady.
Jedel shtab sheshimimen demalys kúnderine de shekteý kúsheıtildi. Senbi-jeksenbi kúnderi:
- oblys aýmaǵynda qoǵamdyq kólik qozǵalysyna tyıym salyndy;
- aýdany 2000 sharshy metrden asatyn saýda nysandarynyń, azyq-túlik sýpermarketteri men saýda-oıyn-saýyq ortalyqtarynyń jumysy toqtatylady, biraq atalǵan nysandardaǵy dárihanalar jabylmaıdy.
- azyq-túliktik emes jáne jabyq azyq-túlik bazarlarynyń jumysy toqtatylady;
- azyq-túlikke jatpaıtyn taýarlar satatyn nysandardyń jumys rejimi saǵat 10:00-den 20:00-ge deıin shekteledi;
- fıtnes-ortalyqtar men sporttyq-saýyqtyrý ortalyqtarynyń jumysy toqtaıdy;
- qoǵamdyq monshalar men saýnalar jumys istemeıdi.
Oblys ákimi baspasóz qyzmetiniń málimetinshe, búgingi tańda Qostanaı oblysyndaǵy epıdemııalyq jaǵdaı turaqty. Indet bastalǵaly aımaqta COVID-19 juqtyrǵan 3 538 naýqastyń 3 198-y, ıaǵnı 90,4%-y emdelip shyqqan.
Qostanaı oblysy
