El men jerdiń tarıhyn ekshep, kókiregine quıǵan kónekóz qarııalardyń aıtýlaryna qaraǵanda, qalanyń batys jaǵyndaǵy toıǵan qozydaı tompaıyp jatqan Buqpa taýynyń baýraıy ıt tumsyǵy ótpeıtin qalyń jynys bolǵan eken. Keıin áldeneshe márte órt shalǵan. Jylan tili sýmańdaǵan qyzyl órtten aman qalǵan ormandy keıin jergilikti jurt aıaýsyz otap, ájetine jaratqan. Qazir Buqpanyń arǵy-bergi betkeıi kóseniń ıegindeı jyp-jylmaǵaı.
Oblystyq «Rýhanı jańǵyrý» óńirlik-jobalyq keńsesiniń ujymy baǵaly bastama kóterip, «Kókshetaý – kók qaraǵaılar mekeni» aksııasyn ótkizdi. Oblys ortalyǵyndaǵy №4 orta mekteptiń janyna 30 túp qaraǵaı ekti. Aldaǵy ýaqytta kóshetterdi sýaryp, kútip-baptaýdy da óz moıyndaryna alyp otyr. Endi osy ıgilikti iske qaladaǵy ujymdar jumyla kirisse, jón bolar edi.
Buǵan deıin de Buqpanyń baýraıyna talaı márte kóshet otyrǵyzylǵan. Kúnge boı salyp, kóktegeni kóp emes. Kóshetti de kózboıaý úshin otyrǵyzý beleń alyp ketti ǵoı. Shybyq shanyshqannan keıin attap baspaǵan soń qanshama kóshet kókteı solyp qaldy. Topyraqqa kómilgen qaıran qarjy deısiz de.
Bul joly ujym kóshetterdi ózderi kútip-baptamaq. Demek, jas kóshettiń ózindeı úlbiregen úmit bar. El ıgiligi úshin, arýaq qonyp, nar shókken ata qonystyń kórki úshin baǵaly bastama qolǵa alyndy, endigisi elge syn!
Kókshetaý qalasy
